Munaily aýdandyq aýrýhanasyna eki apta buryn bir kúnde 60-qa jýyq naýqas koronovirýs belgilerimen júginetin bolsa, qazirgi tańda bul kórsetkish tómendegen, dep habarlaidy "Ult aqparat".
Munaily ortalyq aýdandyq aýrýhanasy dárigerleriniń málimdeýinshe, aýdandaǵy filtr kabinetindegi dárigerlerge qaralatyndar sany salystyrmaly túrde azaiǵan. Máselen, ortalyqta bes filtr kabineti jumys jasap tur. Osydan eki apta buryn mundaǵy aq halattylar kúnine 60-qa jýyq naýqasty qabyldaityn.
Atameken aýylyndaǵy filtr kabinetiniń dárigeri Mahabbat Abdashevanyń aitýynsha, osy aptada dertine em izdep kelýshiler qatary edáýir siregen. Bul - qýantarlyq jaǵdai.
«Ásirese, pnevmoniia óte kóp boldy. Bir kúnde 40-60 adam qabyldadyq. Sonyń 35-i - pnevmoniia, 15-i - JRVI belgilerimen keletin»,- deidi Mahabbat Abdasheva.
Aýdanda 40 oryndyq provizorlyq statsionar jumys istep tur. Budan bólek, 12 ottegi kontsentraty bar.
«Qazirgi ahýal bárimizge belgili. Indet órship, aýrý dendegender sany artty. Biraq bir-birimizdi qoldaý arqyly bul qiyndyqty da eńseretinimiz anyq. Kómek qolyn sozǵan janashyr azamattar men kásipkerler aianyp jatqan joq. Jaqynda Birikken Arab Ámirlikterinen de gýmanitarlyq kómek óńirimizge jetti. Qoldaý bildirip, dárigerler men emdelýshilerge kórsetken qoldaýlaryńyzǵa alǵys aitamyz. Karantin jariialanǵaly aýyryp em izdegender sany azaidy. Aýdanda naýqastardyń em-domyna qajetti ottegi ballondarymyz da bar. Dári-dármek jetkilikti. Aýdandaǵy provizorlyq ortalyqqa jergilikti kásipkerler de barynsha qoldaý kórsetýde», - deidi Munaily ortalyq aýdandyq aýrýhanasy direktorynyń mindetin atqarýshy Janar Dosjanova.
Mańǵystaý oblysyna Birikken Arab Ámirlikterinen kelgen gýmanitarlyq kómektiń bir bóligi Munaily aýdanyndaǵy provizorlyq statsionarǵa jetkizilgen bolatyn. Onyń ishinde 600 kombinezon, 100 qorǵanysh kózildirigi, 1600 bir rettik halat ákelindi. Budan bólek, 2 ÓJJ apparaty jetkizildi.
Aita ketý kerek, buǵan deiin aýdanda ókpeni jasandy jeldetý apparaty bolmaǵan. Provizorlyq ortalyq bul apparatty aldaǵy ýaqytta aýyr jaǵdaidaǵy naýqastardy oblys ortalyǵyna jetkizý úshin qoldanýdy josparlap otyr.
Jalpy, oblys boiynsha koronavirýs infektsiiasy jáne pnevmoniia boiynsha jaǵdaidyń turaqtanǵany baiqalady.
Jedel járdem stansalaryna túsetin shaqyrtý sany azaidy. Oblystyq jedel járdemge shilde aiynyń basynda barlyǵy 900 shaqyrtý tússe, qazirgi tańda oblys boiynsha 595 shaqyrtý túsken. Iaǵni, oblys boiynsha shaqyrtýlar sany 305-ke azaiǵan.
Sondai-aq, provizorlyq statsionarǵa túsetin naýqastardyń sany eki eseden asa qysqardy. Kúnine 250-den 100-ge deiin. Sońǵy aptada jazylyp shyqqan naýqastar sany kúnine 150-ge jetti.
