Mańǵystaý oblysynda anasy men balasy joǵalyp ketti, dep habarlaidy "Ult aqparat" Lada.kz portalyna sliteme jasap.
Bir top adam «Aqtaý - Bozjyra - Qyzylqupy - Qarynjaryq - Buloiyq úńgiri» baǵyty boiynsha jolǵa shyqqan. Top ishinde Olga atty kelinshek basqalardan bólinip, basqa jolǵa túsip ketken. Kólikte anasymen birge jasóspirim bala bolǵan. Olardy eki kún boiy izdedi.
Kelinshektiń qurbysy Irina Mýravevanyń aitýynsha, 4 kólik 29 tamyzda týristik saparǵa shyǵady. Arada bir táýlik ótkende olar Ústirt qoryǵyna jetedi. Sol jerge túnep, erteńinde týrister sońǵy núkte - Buloiyq úńigirine qarai attanǵan.
«Jolda ketip bara jatqanda Olga bizge basqa jolmen baratynyn eskertti. Óitkeni ol buǵan deiin de álgi úńgirge birneshe ret barǵan. Kólikte janarmai jetkilikti edi. Biz úńgirde kezdesemiz dep kelistik. Biraq dittegen jerge jetkende Olgany tappadyq. Ol bárimiz jolǵa attanǵan núktege qaityp ketken bolar degen oimen biz artqa qaittyq. Biraq ony esh jerden tappadyq. Shekarashylar men qoryqshylar eshqandai kólikti kórmedik dedi. Biz óz betimizshe izdeýge kirisip kettik. Jolai «Legion týr» birlestiginiń adamdaryn kezdestirdik, olar óz sharýasyn ysyryp qoiyp, bizge kómekke keldi. Jarty táýlik izdep tappaǵan soń Jańaózenge baryp, áiel men bala joǵalǵanyn habarladyq. Sosyn joǵalǵandardy izdeýge qutqarýshylar jedel qosyldy» deidi Irina.
2 qyrkúiek kúni izdeý jumystarynyń nátijesinde Olga men balasy tabyldy. Týristerdiń kóligi beimálim sebeppen órtenip ketken eken.
«Olardyń as-sýy az edi, onyń ústine qula túzde qoryqtyń jyrtqysh janýarlary bar, olarǵa shynymen úlken qaýip tónip turǵan bolatyn. Eger qutqarýshylar jedel qimyldamaǵanda áiel men balanyń jaǵdaiy ne bolar edi, kim bilsin. Biz Olga men balasyn qutqarýǵa atsalysqan barsha janǵa shynaiy rizashylyǵymyzdy bildiremiz» deidi Irina Mýraveva.
