ماڭعىستاۋ وبلىسىندا اناسى مەن بالاسى جوعالىپ كەتتٸ, دەپ حابارلايدى "ۇلت اقپارات" Lada.kz پورتالىنا سلٸتەمە جاساپ.
بٸر توپ ادام «اقتاۋ - بوزجىرا - قىزىلقۇپى - قارىنجارىق - بۇلويىق ٷڭگٸرٸ» باعىتى بويىنشا جولعا شىققان. توپ ٸشٸندە ولگا اتتى كەلٸنشەك باسقالاردان بٶلٸنٸپ, باسقا جولعا تٷسٸپ كەتكەن. كٶلٸكتە اناسىمەن بٸرگە جاسٶسپٸرٸم بالا بولعان. ولاردى ەكٸ كٷن بويى ٸزدەدٸ.
كەلٸنشەكتٸڭ قۇربىسى يرينا مۋراۆەۆانىڭ ايتۋىنشا, 4 كٶلٸك 29 تامىزدا تۋريستٸك ساپارعا شىعادى. ارادا بٸر تەۋلٸك ٶتكەندە ولار ٷستٸرت قورىعىنا جەتەدٸ. سول جەرگە تٷنەپ, ەرتەڭٸندە تۋريستەر سوڭعى نٷكتە - بۇلويىق ٷڭٸگٸرٸنە قاراي اتتانعان.
«جولدا كەتٸپ بارا جاتقاندا ولگا بٸزگە باسقا جولمەن باراتىنىن ەسكەرتتٸ. ٶيتكەنٸ ول بۇعان دەيٸن دە ەلگٸ ٷڭگٸرگە بٸرنەشە رەت بارعان. كٶلٸكتە جانارماي جەتكٸلٸكتٸ ەدٸ. بٸز ٷڭگٸردە كەزدەسەمٸز دەپ كەلٸستٸك. بٸراق دٸتتەگەن جەرگە جەتكەندە ولگانى تاپپادىق. ول بەرٸمٸز جولعا اتتانعان نٷكتەگە قايتىپ كەتكەن بولار دەگەن ويمەن بٸز ارتقا قايتتىق. بٸراق ونى ەش جەردەن تاپپادىق. شەكاراشىلار مەن قورىقشىلار ەشقانداي كٶلٸكتٸ كٶرمەدٸك دەدٸ. بٸز ٶز بەتٸمٸزشە ٸزدەۋگە كٸرٸسٸپ كەتتٸك. جولاي «لەگيون تۋر» بٸرلەستٸگٸنٸڭ ادامدارىن كەزدەستٸردٸك, ولار ٶز شارۋاسىن ىسىرىپ قويىپ, بٸزگە كٶمەككە كەلدٸ. جارتى تەۋلٸك ٸزدەپ تاپپاعان سوڭ جاڭاٶزەنگە بارىپ, ەيەل مەن بالا جوعالعانىن حابارلادىق. سوسىن جوعالعانداردى ٸزدەۋگە قۇتقارۋشىلار جەدەل قوسىلدى» دەيدٸ يرينا.
2 قىركٷيەك كٷنٸ ٸزدەۋ جۇمىستارىنىڭ نەتيجەسٸندە ولگا مەن بالاسى تابىلدى. تۋريستەردٸڭ كٶلٸگٸ بەيمەلٸم سەبەپپەن ٶرتەنٸپ كەتكەن ەكەن.
«ولاردىڭ اس-سۋى از ەدٸ, ونىڭ ٷستٸنە قۇلا تٷزدە قورىقتىڭ جىرتقىش جانۋارلارى بار, ولارعا شىنىمەن ٷلكەن قاۋٸپ تٶنٸپ تۇرعان بولاتىن. ەگەر قۇتقارۋشىلار جەدەل قيمىلداماعاندا ەيەل مەن بالانىڭ جاعدايى نە بولار ەدٸ, كٸم بٸلسٸن. بٸز ولگا مەن بالاسىن قۇتقارۋعا اتسالىسقان بارشا جانعا شىنايى ريزاشىلىعىمىزدى بٸلدٸرەمٸز» دەيدٸ يرينا مۋراۆەۆا.
