Mańǵystaý oblysyn damytýdyń besjyldyq jospary aiasynda sharýalardyń sý jetkizý shyǵyndaryn sýbsidiialaý sharalary engizildi. Bul týraly QR Aýyl sharýashylyǵy ministri Erbol Qarashókeev Úkimet otyrysynda málim etti, dep habarlaidy QazAqparat.
«Ózderińiz biletindei, biylǵy jyl óńir úshin óte qiyn boldy, aýa raiynyń óte ystyq bolýy, sondai-aq kóktemde jáne jazda jaýyn-shashynnyń bolmaýy azyq jaǵdaiyna qatty áser etti jáne oblystyń osy baǵyttaǵy mańyzdy problemalaryn kóbeitti. Bul faktorlardyń barlyǵy keshendi josparda eskerildi, nátijesinde «Agroónerkásiptik keshen» bólimine 8 is-shara engizildi», - dedi ministr.
Aitýynsha ol jobalar myna baǵyttardy qamtyǵan:
- aýyl sharýashylyǵy janýarlary úshin azyqtyń turaqtandyrý qorlaryn qalyptastyrý, jerasty sýlaryna jete barlaý júrgizý, «Beineý astyq terminalynyń» múlkin satyp alý máselesin pysyqtaý;
- asyl tuqymdy túie sharýashylyǵyn damytý, investitsiialyq sýbsidiialaý jáne aýyl sharýashylyǵy taýaryn óndirýshiler úshin sý jetkizý qyzmetteriniń qunyn sýbsidiialaý;
- jylyjai salý, balyq ósirý, qurama jem, qus etin óndirý boiynsha 147,3 mlrd teńgeniń 25 investitsiialyq jobasyn iske asyrý.
«Biyl 8,8 mlrd teńge somasyna 12 investitsiialyq jobany iske asyrý kózdelgen. Onyń ishinde 7,2 mlrd teńge somasyna 6 joba paidalanýǵa berildi. Qalǵan 6 joba aiaqtalý satysynda, olardy tórtinshi toqsanda paidalanýǵa berý josparlanyp otyr», - dedi Erbol Qarashókeev.
