Mańǵystaý oblysynda jumyssyz aýyl turǵyndary jumysqa ornalastyrýdy talap etip, joldy jaýyp tastady, - dep habarlaidy Tengrinews.kz agenttigi.
"29 maýsym saǵat 18.20-da Jetibai men Munaishynyń 30-ǵa jýyq jumyssyz turǵyny munai sektoryna jumysqa ornalastyrýdy talap etip, "Mańǵystaýmunaigaz" AQ ken ornyna baratyn joldy jaýyp tastady", – dep habarlaidy Mańǵystaý oblysynyń ákimdigi.
Qaraqiia aýdany ákimdiginiń ókilderi jinalǵandarǵa túsindirme jumystaryn júrgizdi.
"Olarǵa jumysqa ornalastyrý jalpy kezek boiynsha júrgiziletini habarlandy. Kezekten tys jumysqa ornalastyrý basqa úmitkerlerge jasalǵan ádiletsizdik bolady", - delingen habarlamada.
Ákimdik aýdanda jyl basynan beri 366 jumys orny ashylǵanyn, bul maqsatqa 2022 jyly óńirlik joba aiasynda 180 million teńge bólingenin basa aitty.
"Qazir bul baǵdarlama boiynsha 172 adam jumys isteidi. Jumysshylardyń ortasha jalaqysy 170 000 teńgeni qurady. Aita keteiik, qazirgi ýaqytta oblystyq jumyspen qamtý ortalyǵynda ortasha jalaqysy 100 000 teńgeden asatyn bos oryndar bar. Biraq turǵyndardyń basym bóligi jalpy kezekti ainalyp ótip, munai salasyna jumysqa ornalastyrýdy talap etip, qarapaiym jumysqa barýdan bas tartady", - dep qorytyndylady ákimshilik.
Keiin oblys ákimdigi Qaraqiia aýdanynyń ákimi, IIB bastyǵynyń birinshi orynbasary, sondai-aq aýdandyq prokýratýra men ishki ister organdarynyń basshylary jinalǵandarmen túsindirme áńgime júrgizgenin aitty.
Júrgizilgen túsindirý jumystarynyń nátijesinde saǵat 21.40-ta barlyq jumyssyz azamattar taraǵan.
