Foto: Kólik ministrligi
2026 jylǵy 16 qańtar kúni túngi saǵat 01:03 shamasynda KZ-11 «Dossor – Qulsary – Beineý – Saiótes – Shetpe – Jetibai – Aqtaý» avtojolynyń 383-shaqyrymynda jolaýshylar avtobýsynyń qatysýymen jol-kólik oqiǵasy tirkeldi, dep habarlaidy Ult.kz.
Aldyn ala málimet boiynsha, Aqtaý qalasynan Beineý aýyly baǵytynda kele jatqan Yutong markaly avtobýs júrgizýshisi rýlge ie bola almai, kólik aýdarylyp ketken. Avtobýs 2025 jylǵy 19 jeltoqsanda tehnikalyq baiqaýdan ótken jáne «CASPIAN TRANS CORPORATION» LLC kompaniiasynda tirkelgen.
Jol-kólik oqiǵasy saldarynan oqiǵa ornynda tórt jolaýshy qaza taýyp, taǵy úsh adam ártúrli dárejedegi jaraqat alyp, meditsinalyq mekemelerge jetkizildi. Avtobýsta barlyǵy 50 jolaýshy bolǵany belgili.
Atalǵan avtojol ýchaskesi tehnikalyq II sanatqa jatady. Jol jamylǵysy asfaltbetondy, joldyń eni 9 metrdi quraidy. Aldyn ala tekserý barysynda jol jamylǵysynda aqaýlar anyqtalmaǵan, jol belgileri bekitilgen talaptarǵa sai tolyq ornatylǵan. Apat táýliktiń qarańǵy ýaqytynda oryn alǵan.
Avtobýsty 1985 jyly týǵan júrgizýshi basqarǵan. Aldyn ala derekke sáikes, jol-kólik oqiǵasy bolǵan jerden shamamen 200 shaqyrym buryn ekinshi júrgizýshimen aýysý júrgizilgen.
Qazirgi ýaqytta atalǵan derek boiynsha Mańǵystaý oblysy Politsiia departamenti barlyq mán-jailardy anyqtaýǵa baǵyttalǵan tergeý sharalaryn júrgizip jatyr.
