Mańǵystaý oblysynda karantin talaptaryn buzyp, Ekonomika jáne biýdjettik josparlaý basqarmasy basshysynyń týǵan kúnine qatysqan memlekettik qyzmetshiler jazalandy. Bul týraly Memlekettik qyzmet isteri agenttiginiń óńir boiynsha departamenti habarlady.
Mańǵystaý oblysynda Ádep jónindegi keńestiń kezekti otyrysynda jergilikti atqarýshy organdardyń laýazymdy tulǵalarynyń is-áreketine qatysty birneshe tártiptik is qaraldy.
Departamenttiń málimetinshe, otyrys barysynda biylǵy 14 qyrkúiekte týǵan kúnin dúrkiretip toilaǵan oblystyq Ekonomika jáne biýdjettik josparlaý basqarmasynyń basshysy Marina Álbekovanyń áreketi qaraldy.
«Sharaǵa qatysqan qyzmetshilerdiń túsindirýinshe, olar Mańǵystaý aýdanynda ornalasqan «Airaqty» taýyna saiahatqa shyǵyp, sporttyq oiyndar ótkizgen. Sol jerden túski as iship, qyzmetshilerge ózderimen alyp kelgen shaǵyn syilyqtaryn taratqan. Bul sharanyń maqsaty «qyzmetshiler arasynda korporativtik mádenietti qalyptastyrý» dep kórsetken. Alaida, keńes músheleri bul túsindirmelerdi «jazadan qutylýǵa áreket» dep qabyldady», - delingen habarlamada.
Eske salsaq, M. Álbekova QR ÁQBtK-niń 425-baby 1-bóligimen ákimshilik jazaǵa tartylǵan bolatyn. Bul bap boiynsha laýazymdy tulǵalar 230 AEK, iaǵni 638 940 teńge kóleminde aiyppul tóleýge mindetteledi. Sondai-aq Mańǵystaý oblysy ákiminiń 14 qyrkúiektegi ókimimen oǵan «sógis» túrinde tártiptik jaza qoldanylǵan.
Ádep jónindegi keńes osy sharaǵa qatysqan basqa da laýazymdy tulǵalarǵa jaza qoldanýdy usyndy.
«Mańǵystaý oblysynyń Ekonomika jáne biýdjettik josparlaý basqarmasy basshysynyń orynbasaryna, Mańǵystaý aýdany ákiminiń orynbasaryna, Mańǵystaý aýdanynyń qurylys, sáýlet jáne qala qurylysy bóliminiń basshysyna, Mańǵystaý jáne Munaily aýdandyq ekonomika jáne josparlaý bóliminiń basshylaryna qatysty tártiptik ister keńeste talqylandy. Sharaǵa qatysqan basshy laýazymdaǵy memlekettik qyzmetshilerdiń is-áreketinde Ádep kodeksiniń birneshe tarmaǵy buzylǵan dep taýyp, basym kópshilik daýyspen olarǵa «qatań sógis» túrinde tártiptik jaza qoldanýdy usyný qajet dep sheshti», - dedi vedomstvodan.
