Mańǵystaý mektepterinde elýge jýyq «Ábishtaný» kabineti ashylǵan.
Bul jóninde búgin Óńirlik kommýnikatsiialar qyzmeti alańynda ótken brifingte Mańǵystaý oblystyq bilim basqarmasynyń basshysy Asqar Seidaliev málimdedi.
Byltyrǵy oqý jylynda Mańǵystaý oblysynda Ábish Kekilbaiulynyń týǵanyna 80 jyl tolýyna orai barlyq mektep oqýshylary men ustazdar arasynda túrli baǵytta mektepishilik tanymdyq-mádeni sharalar, ashyq synyp saǵattary men tárbie saǵattary, desant sabaqtar uiymdastyrylǵan.
«Ábish Kekilbaev – zamanymyzdyń zańǵar tulǵasy» atty rýhani jańǵyrý baǵdarlamasy aiasynda oqýshylardy jazýshy ómiri men shyǵarmashylyq jolynan maǵlumat berý, oqýshylardy patriottyqqa tárbieleý maqsatynda seminarlar ótip, kemel eldiń kemeńger qalamgeriniń eńbekterin nasihattaý baǵytynda onyń otbasymen úzeńgiles dostary týraly beinerolikter kórsetilgen. «Ábish ósken ólke», «Mańǵystaý zańǵary-Ábish aǵa», «Qalamger, qairatker, saiasatker-Ábish» taqyryptarynda bastaýysh synyp oqýshylaryna synyp saǵattary ótkizilip, «Mańǵaz dalanyń zańǵar tulǵasy» taqyrybynda mádeni shara, Á.Kekilbaiulynyń «Kúi» povesi boiynsha kitap konferentsiiasy, «Ańyzǵa ainalǵan abyz» kórkem sóz oqý baiqaýy ótkizilip, «Parasat biiginde» jazýshynyń saiasi qyzmetinen oqýshylarǵa málimetter berilgen.
«Oblystyq «Mańǵystaýnama-2018» tanymdyq sharasy Á.Kekilbaevtyń 80-jyldyǵyna arnalyp, sharaǵa oblys boiynsha 26 muǵalim qatysqan. Shara barysynda «Ábish Kekilbaev shyǵarmashylyǵy men ómirine arnalǵan oqý-tanymdyq kabinetter baiqaýy», «Ábish Kekilbaev shyǵarmashylyǵynan muǵalimderdiń desant sabaqtar baiqaýy», «Ábish Kekilbaev eńbekterindegi danalyq sózder jinaǵyn shyǵarý» jáne «Týǵan jer óziń degende...» taqyrybymen Ábish Kekilbaevtyń bir shyǵarmasy boiynsha izdenis joba baiqaýy» ótkizildi. Qorytyndysynda jeńimpaz muǵalimder bilim basqarmasynyń diplomdarymen jáne baǵaly syilyqtarymen marapattaldy. Sondai-aq naýryz aiynda oqýshylar arasynda ótken oblystyq syrttai «Á. Kekilbaev shyǵarmalarynan sýretter» baiqaýyna 13 oqýshy qatysty »,-dedi brifing barysynda Mańǵystaý oblystyq bilim basqarmasynyń basshysy.
Sondai-aq brifingte qyrkúiek-qazan ailarynda aýdan, qala mektepterinde Ábish Kekilbaevtyń 80-jyldyǵyna orai birqatar sharalar uiymdastyrylmaq.
Mańǵystaý oblysy mektepterinde 47 «Ábishtaný» kabinetteri ashylǵan. Qazan aiynda Beineý aýdanyndaǵy Sam orta mektebinde taǵy 1 kabinet ashylady. Muǵalimder arasynda oblystyq «Ǵulama tulǵa – ǵibratty ǵumyr» taqyrybynda oblystyq sahnalyq qoiylym baiqaýy jáne «Á. Kekilbaevtyń keńistigi» atty oblystyq jáne halyqaralyq ǵylymi – teoriialyq konferentsiiasy ótetin bolady.
«Abyz aǵa - Ábish» baiqaýynyń jeńimpazdaryna arnaiy shákirtaqy taǵaiyndalady.
