Aqtaýdan shalǵai jatqan Jarma, Sazdy, Saýysqan eldi mekenderi qumnyń astynda qalýy múmkin, dep habarlaidy Ulysmedia.kz portaly Atameken Business saityna silteme jasap.
«Qum meniń bala kezimde, shamamen 60 jyldai buryn, aýyldan 300 metrdei jerde edi. 1996 jyldan bastap qum kóship bastady, sońǵy kezde údei tústi. Qora, qudyq degenderdi basyp qaldy. Endi osy qumdy toqtatý kerek. Qorshaý ornatatyn bolsa, shóp óser edi», - deidi Jarma aýylynyń turǵyny Igilik Ótesinov.
Tabiǵi apattan zardap shegip otyrǵan Jarma aýylynda 100-ge jýyq turǵyn bar. Olar jyl saiyn arnaiy tehnika jaldap, aýlalaryn qumnan arshyp, alysqa tasytady. Biraq oǵan turǵylyqty halyqtyń báriniń birdei jaǵdaiy jetpeidi. Sondyqtan jaýaptylardyń tezirek sekseýil egip, qum kóshkinine toitarys berýin suraidy. Osy jaǵdai Saýysqan, Sazdy eldi mekenderinde de oryn alyp otyr.
«Jyl basynan bastap biz tórt ret konkýrs jariialaǵan bolatynbyz. Ókinishke qarai, merdigerler konkýrsqa qatyspady. Bir apta buryn biz besinshi ret konkýrs jariialadyq. 2004 jyldan beri sekseýil egý jumysyn júrgizip kele jatyrmyz. Qazirgi ýaqytqa deiin Senek, Tushyqudyq, Shebir jáne Ushtaǵan aýyldaryna 3236 gektar sekseýil ektik», - dedi Mańǵystaý oblystyq tabiǵi resýrstar basqarmasynyń bólim basshysy Erbol Denov.
Memlekettik satyp alý konkýrsy qaita jariialanǵan. Eger baiqaýda merdiger anyqtalsa, jyl sońyna deiin úsh eldi mekende – Saýysqan, Sazdy, Jarmada 135 gektar aýmaq qorshalyp, keler jyly sekseýil egý jumysy bastalady. Jalpy osy jumystarǵa 6 jylǵa 408 million teńge qarajat qarastyrylǵan.
