Májilis depýtaty Berik Ábdiǵaliuly Qazaqstanda nege jekemenshik mekemelerdiń mańdaishalaryn, mázirleri men baǵalaryn qazaq tilinde jazý týraly talapty engizý josparlanyp otyrǵanyn túsindirdi, - dep habarlaidy Tengrinews.kz saity.
6 qazanda Májilis kórneki aqparat quraldaryn ózgertý týraly máseleni ekinshi otyrysta qabyldady. Elimizde jol belgilerin, jarnamalyq habarlandyrýlardy, mańdaishalardy, baǵalardy, as máziri men basqa da aqparatty qazaq tilinde, qajet jaǵdaida orys tilinde nemese ózge de tilderde jazý týraly talaptar engizý josparlanyp otyr.
Depýtat Parlamentte qaralyp jatqan normalar birinshi kezekte memlekettik organdarda, jeke uiymdarda memlekettik tildi júielendirýge, durys qoldanýǵa baǵyttalǵanyn atap ótti.
"Normada kórneki aqparat mátinderinde orfografiia men túpnusqa aýdarma erejelerin saqtaý týraly talap kórsetilgen. Sondai-aq, zańnamalyq túzetýlerde kórneki aqparatty memlekettik jáne memlekettik emes uiymdardyń blankileri men mańdaishalaryna, jol belgilerine, temirjol jáne avtovokzaldarǵa jáne t.b. ornalastyrý tártibi jazylǵan.
Mysaly, temirjol stantsiialarynda, vokzaldarda, poiyzdarda jáne jolaýshylarǵa qyzmet kórsetetin basqa jerlerde aqparat memlekettik tilde jáne orys tilinde, al qajet jaǵdaida basqa tilderde de usynylýy kerek", - dep túsindirdi parlament múshesi.
Onyń aitýynsha, memlekettik uiymdarda mańdaishalar men blankilerge qazaq jáne orys tilderinde aqparat ornalastyrý týraly talap saqtalady.
"Til týraly" Zań normalarynda bul anyq jazylǵan: memlekettik uiymdardyń mańdaishalary men blankileri memlekettik jáne orys tilderinde, sondai-aq qajet jaǵdaida basqa da tilderde jazylady.
Qabyldanǵan túzetýler birinshi kezekte memlekettik tildi qoldanýdy júielendirýge jáne retteýge baǵyttalǵan. Bul jalpy qazaq tilin reformalaý aiasynda mańyzdy jáne onyń elimizdiń Konstitýtsiiasynda bekitilgen mártebesine sáikes keledi", - dedi ol.
Berik Ábdiǵaliuly jeke uiymdardyń mańdaishalary men blankileri, memlekettik emes uiymdarda kórneki aqparattyń memlekettik tilde berilýin zańnamalyq turǵydan bekitý usynylatyny týraly aitty. Onyń aitýynsha, bul norma memlekettik tildiń róli men mártebesin nyǵaitý úshin mańyzdy.
"Memlekettik emes uiymdardyń mańdaishalary men blankileri, habarlandyrýlar, jarnama, preiskýranttar, baǵalar, mázirler, kórsetkishter jáne basqa da kórneki aqparat memlekettik tilde, sondai-aq, qajet jaǵdaida orys tilinde nemese basqa da tilderde jazatynyn zań júzinde bekitý usynylady.
Iaǵni, biz jeke bizneske tańdaý quqyǵyn beremiz, óz uiymy týraly aqparatty tek memlekettik tilde jáne kásip iesiniń qalaýy boiynsha orys jáne basqa da tilderde jazýǵa bolady. Bul - qalypty tájiribe, biznes ózi týraly aqparatty qai tilde, árine, memlekettik tilge nuqsan keltirmei, jazý keregin óz betinshe sheshe alýy tiis", - dep atap ótti Berik Ábdiǵaliuly.
Depýtat májiliste talqylanǵan normalar Qazaqstandaǵy til saiasatyna eshqandai teris ózgeris ákelmeidi dep oilaidy.
"Usynylǵan ózgerister memlekettik jáne memlekettik emes uiymdar úshin kórneki aqparat pen derektemelerdi memlekettik jáne orys tilderinde, resmi mártebesi bar, qazir qoldanystaǵy zańnamada joq tilderde jazýdy naqtylaidy. Halyq arasynda bos daýlar men eki jaqty túsinik qalyptastyrmaý úshin osyndai ózgerister usynyldy", - dep túiindedi ol.
