Bul týraly Nur-Sultan qalasy ákimdiginde ótken baspasóz konferentsiiasynda Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qisyqova aitty, dep habarlaidy "Ult aqparat".
Qazaqstanda mindetti áleýmettik saqtandyrý júiesi iske qosyldy. Meditsinalyq kómek endigi kezekte MÁMS jáne tegin meditsinalyq kómektiń kepildendirilgen kólemi aiasynda kórsetiledi.
«MÁMS júiesiniń artyqshylyǵy - azamattar emhana men dárigerdi erkin tańdaidy, sondai-aq saqtandyrý boiynsha Áleýmettik meditsinalyq saqtandyrý qorymen kelisimshartqa otyrǵan jeke menshik klinikaǵa da tirkele alady», - deidi Sáýle Qisyqova.
Onyń aitýynsha, 2020 jyldyń 1 qańtaryndaǵy kórsetkish boiynsha Nur-Sultan qalasyndaǵy emhanalarǵa 1 162 878 adam tirkelgen. Jasalǵan kelisimsharttyń jalpy somasy - 126 mlrd teńge.
«Nur-Sultan qalasynda myń adam eshbir emhanaǵa tirkelmegen. Osy oraida MÁMS júiesi barlyǵyna birdei mindettelgenin aita ketý kerek. Emhanaǵa kelgen kezde bazadan bári shyǵyp turady. 1 sáýirge deiin ár adam MÁMS júiesinde óz mártebesin anyqtap alýy kerek. Iaǵni, ózin saqtandyryp nemese jeńildigi bar tulǵalar qataryna tirkelý qajet. Tegin meditsinalyq kómek memleket jarna tóleitin 15 sanattaǵy jeńildigi bar tulǵalarǵa qarastyrylǵan», - deidi ol.
2020 jylǵy meditsinalyq kómek kórsetýdiń jańa modeliniń birqatar erekshelikteri bar.
«Birinshi deńgei - tegin meditsinalyq kómektiń kepildendirilgen kólemi. Ekinshi deńgei - mindetti áleýmettik meditsinalyq saqtandyrý. Buryn zerthanalyq jumystar, qymbat turatyn diagnostika qoljetimsiz bolsa, biyl KT, MRT siiaqty diagnostikalaý túrlerine, zerthanalyq jumystarǵa, fýnktsionaldy diagnostikaǵa, stomatologiialyq kómekke jáne basqa da meditsinalyq qyzmet túrlerine MÁMS tarapynan 8 mlrd teńge bólindi. Bolashaqta ońaltý jumystary úshin de qarjy bólinedi dep josparlanyp otyr», - deidi Sáýle Qisyqova.
