Osy jyldyń 1 sáýirinen bastap elimizdi mindetti áleýmettik meditsinalyq saqtandyrý tolyqqandy jumys isteidi. Al oǵan deiin qazaqstandyqtar meditsinalyq kómekti qalai alatyndyǵyn MÁMS-ti engizý jónindegi jobalyq keńse túsindirip berdi, dep habarlaidy QazAqparat.
Agenttik tilshisimen áńgimelesý barysynda MÁMS-ti engizý jónindegi jobalyq keńse jetekshisi Záýresh Balkenova bul júieniń elimizde 2020 jyldyń 1 qańtarynan iske qosylǵandyǵyn aitady. Dál sol datadan bastap Qazaqstandaǵy barlyq meditsinalyq kómek eki toptamamen kórsetilýde.
«Birinshi toptama – tegin meditsinalyq kómektiń kepildendirilgen kólemi. Onymen shuǵyl meditsinalyq aralasý qajet etetin jedel kómekten bastap, sanitarlyq aviatsiialyq kómek, birqatar sozylmaly aýrýlardyń ózgerisin baqylaý, jedel kórsetkishter boiynsha statsionardyń ornyn almastyratyn kómek kórsetiledi. Munan bólek, barlyq qazaqstandyq saqtandyrý júiesindegi mártebelerine qaramastan, emhanalarǵa júginip, statsionarda shuǵyl em men áleýmettik aýrýlar kezinde qajetti meditsinalyq kómektiń barlyq túrin ala alady. Ekinshisi – mindetti áleýmettik meditsinalyq saqtandyrý. Iaǵni, áleýmettik meditsinalyq saqtandyrý aiasynda meditsinalyq kómek alýǵa múmkindik bar. Saqtandyrý toptamasyna qymbat ota men meditsinalyq qyzmetter, salalyq mamandardyń qabyldaýy, ómir sapasyn jaqsartýǵa baǵyttalǵan qyzmetter kiredi. MÁMS magnitti-rezonansty tomografiia, kompiýterlik tomografiia, polimerazdy tizbekti reaktsiia-saraptamasy syndy kúrdeli qyzmetterdi jabady. Munan bólek, tegin emdeletin aýrýlar túrine kirmeitin aýrýlardy statsionardyń ornyn almastyratyn kómek, josparly statsionarlyq kómek kórsetiledi», - dedi Záýresh Balkenova.
Onyń atap ótýinshe, kepildendirilgen topta saqtandyrý júiesindegi mártebesine qaramastan barlyq azamattarǵa, elimizde turaqty turatyn sheteldikter men azamattyǵy joq adamdarǵa kórsetiledi. Al MÁMS jarna tóleitinderge nemese jarnasy aýdarylatyn adamdarǵa ǵana qoljetimdi.
«MÁMS júiesine qatysý eldiń barlyq azamaty úshin mindetti sanalady. Meditsinalyq saqtandyrý qoryna ai saiyn jarna tóleý arqyly meditsinalyq qyzmettiń eki toptamasyn memlekettik, sondai-aq jekemenshik klinikalardan alýǵa bolady. 1 sáýirge deiin barlyq qazaqstandyqtar shartty túrde saqtandyrylǵan dep eseptelinedi. Al MÁMS iske qosylǵannan keiin 3 ai ótken soń saqtandyrylmaǵan azamattar úshin josparly meditsinalyq kómek qoljetimsiz bolady», - dedi jobalyq keńse jetekshisi.
