Qazaqstanda 94 myńǵa jýyq múgedek bala bar. Onyń 19 myńyna tserebraldy sal aýrýy nemese DTsP diagnozy qoiylǵan. Bul týraly «Áleýmettik meditsinalyq saqtandyrý qory» KEAQ Almaty qalalyq filialy málim etti, dep habarlaidy "Ult aqparat".
2020 jyldan bastap reabilitatsiia men qalpyna keltirýge baǵyttalǵan em-dom sharalary mindetti áleýmettik meditsinalyq saqtandyrý paketine engizildi. Memleket tarapynan saqtandyrylatyn 15 sanatqa jatatyn balalar meditsinalyq kómekti tegin paidalana alady. Máselen, bir ǵana 2020 jyly balalarǵa arnap elimiz boiynsha 58 myń ońaltý sharasy júrgizilgen.
Jańa reformanyń nátijesinde mamandandyrylǵan meditsinalyq kómek kórsetýge qulshynys bildirip otyrǵan meditsina uiymdarynyń sany da birneshe ese artty. Olardyń qatarynda «Múgedek balalardyń ata-analary qaýymdastyǵy» reabilitatsiia ortalyǵy da bar. Onda sal aýrýymen aýyratyn balalardy úshinshi kezeńdik reabilitatsiiadan ótkizedi.
«Múgedek balalardyń ata-analary qaýymdastyǵy» 1991 jyly jeltoqsan aiynda óz balalaryna kómek qolyn sozýǵa qulshynǵan ata-analardyń bastamasymen qurylǵan. Otyz jylǵa jyq ýaqyttan beri olar múmkindigi shekteýli bala tárbielep otyrǵan 745 otbasyna qoldaý kórsetipti. 2004 jyly reabilitatsiia ortalyǵy bolyp qaita qurylǵan qaýymdastyq búginde sal aýrýyna shaldyqqan balalardy keshendi ońaltýmen ainalysady..
«Bizdiń ortalyq mamandary erekshe balalardy fizikalyq jaǵynan ońaltyp qana qoimai, psihologiialyq-pedagogikalyq kómek te kórsetedi. Nevrolog, pediatr, reabilitolog psihoterapevt, emdik shynyqtyrý mamany, massajist, ortoped, psiholog, ergoterapevt, defektolog, logoped, áleýmettik qyzmetkerden turatyn mýltidistsiplinarlyq komanda jumys isteidi. Biz bárimiz múgedek balalar men olardyń ata-analaryna jan-jaqty qoldaý kórsetýge tyrysamyz», - deidi ortalyqtyń bas dárigeri Aisulý Qojanova.
Sondai-aq, ortalyqta ergoterapiia bólimshesi, Montessori kabineti, sensorlyq bólmeler bar. Kinezioterapiia jáne mehanoterapiia kabinetteri saýsaqtyń usaq motorikasyn damytýǵa arnalǵan zamanaýi qondyrǵylarmen jabdyqtalǵan. Eń bastysy - munda árdaiym erekshe balalardy durys damytýǵa qolushyn sozýǵa daiyn turatyn qaiyrymdy jandar jumys isteidi.
«Ata-ana balasyn alyp kelgen kezde biz 3 túrli nársege mán beremiz. Eń aldymen qimyl-qozǵalysy áli qalypqa túspegen balaǵa kóńil bólemiz. Mamandar birden ony jan-jaqty damytýǵa kirisedi. Ekinshi - balanyń otbasy. Óitkeni, kemtar bala sol otbasynda ómir súredi, sondyqtan olar da bizdiń komandanyń bir múshesine ainalýy tiis. Mamandar balaǵa úide de qolaily atmosfera qalyptastyrýǵa kómektesedi. Úshinshi – qorshaǵan orta. Balanyń ómirine munyń da tigizetin áseri mol», - deidi ortalyq qyzmetkerleri.
MÁMS engizilgeli beri ortalyqta 200-den astam bala ońaltyldy. Ortalyqqa qoldan kelgenshe kómektesetin qaiyrymdy jandar da az emes. Sonyń arqasynda olar múgedek balalarǵa jan-jaqty kómek kórsetýge múmkindik alyp otyr. Mindetti áleýmettik meditsinalyq saqtandyrý engizilgeli beri ortalyqtyń múmkindigi eselene túsken. MÁMS engizilgen 2020 jyldan bastap ARDI emhananyń joldamasymen kelgen múgedek balalarǵa ońaltý qyzmetin kórsetý týraly bastama kóterdi. Sońǵy bir jyldan astam ýaqyt ishinde ortalyqta 200-den astam bala reabilitatsiiadan ótti.
Aita keteiik, mekemede bilim berý ortalyǵy da jumys isteidi. Onda Qazaqstannyń túpkir-túpkirinen kelgen mamandar sheteldik tálimgerlerdiń treningterine qatysyp, erekshe balalarmen jumystyń qyr-syryn úirenedi.
