Qazaqstandyqtar 1 sáýirge deiin mindetti áleýmettik meditsinalyq saqtandyrý (MÁMS) júiesindegi óz mártebesin anyqtaýy tiis. Bul týraly Óńirlik kommýnikatsiialar qyzmetinde ótken baspasóz máslihatynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aitty, dep habarlaidy QazAqparat.
«Osy ýaqytqa deiin eldegi barlyq turǵyndar MÁMS aiasynda mártebesine qaramastan meditsinalyq kómek ala alatyn. Al 1 sáýirden bastap bul qyzmetti tolyq kólemde alý úshin saqtandyrý jasaý kerek», - dedi T.Ábildaev.
Brifing barysynda Almatyda 48 myń adam ózin-ózi jumyspen qamtyp otyrǵany aityldy. Bul sanat úshin meditsinalyq saqtandyrýdyń 2 túri qarastyrylǵan.
«Búginde olar eń tómengi jalaqynyń 5 paiyzyn (2125 teńge aiyna) tólese bolady. Nemese biryńǵai jinaqtyq tólem aýdarsa jetkilikti. Iaǵni ol qala turǵyndaryna 1 AEK-ti (2651 teńge) qurasa, aýyl turǵyndary úshin 0,5 AEK (1326 teńge)», — dedi ol.
Qazaqstandyqtar MÁMS salymyn «Qazposhta» AQ bólimsheleri, 25 ekinshi deńgeili bank jáne 7 internet-banking portaly arqyly tólei alady.
Tutynýshylar meditsinalyq mekemege barmas buryn óz mártebesin e-gov portalyndaǵy Telegram-bottyń kómegimen nemese QR Densaýlyq saqtaý ministrligi men Áleýmettik meditsinalyq saqtandyrý qorynyń resmi saittaryndaǵy siltemelerge ótý arqyly bile alady.
