QR Densaýlyq saqtaý vitse-ministri Kamaljan Nadyrov Shymkenttegi meditsina uiymy basshylarymen kezdesip, MÁMS júiesi boiynsha kórsetilip jatqan meditsinalyq qyzmetterdiń barysymen tanysty. Sondai-aq emhanalarda meditsinalyq qyzmet kórsetetin beiindi mamandardyń jumys kestesin baqylady, dep habarlaidy "Ult aqparat".
QR Densaýlyq saqtaý vitse-ministri Qamaljan Nadyrov jáne ministrliktiń investitsiialyq saiasat departamentiniń direktory Aslan Kinaiatov bastaǵan aimaqtyń shtab músheleri úshinshi megapoliste kórsetilip jatqan meditsinalyq qyzmetterdiń jan-jaqtylyǵyn, tolyqtyǵyn qaraý maqsatynda birqatar meditsinalyq mekemelerdi aralap shyqty.
Jumysshy top ókilderi qaladaǵy №8 jáne №13 emhanalardy aralap, tirkeý bóliminiń jumysy arqyly patsientterdiń mártebesin jáne saqtandyrylǵany jóninde aqparatty tekserip kórdi. Jumys toby naýqastar úshin beiindi mamandar qyzmetiniń qanshalyqty qoljetimdi ekenin biryńǵai KMIS mobildi qosymsha júiesi arqyly tekserdi.
Sondai-aq, kardiologiialyq ortalyqtyń jumysymen tanysqan top músheleri naýqastarmen tildesti. Ortalyqtyń direktory Ermaǵanbet Qýatbaevtyń sózinshe, saqtandyrý júiesi boiynsha ortalyqqa shuǵyl jaǵdaida jetkiziletin patsientterge kómek kórsetýde eshqandai kedergiler joq. Sebebi jańa júie boiynsha naýqastarǵa jedel kómek kórsetý burynǵysha tegin meditsinalyq kómektiń kepildik berilgen kóleminiń sheńberi negizinde kórsetiledi. Sonymen qatar jumysshy top músheleri qalalyq ákimdikte ótken jiynǵa qatysty. Májiliste sóz alǵan QR Densaýlyq saqtaý vitse-ministri Kamaljan Talǵatuly qalanyń meditsinalyq uiymdary jańa júie boiynsha jumys isteýge daiyn ekenderine kóz jetkizgenin atap ótti. Sala mamandaryna naýqastar úshin kez-kelgen qyzmet qol jetimdi bolý qajettigin tilge tiek etti.
«Aǵymdaǵy jyldyń birinshi sáýirine deiin kez-kelgen patsienttiń mártebesi shartty túrde saqtandyrylǵan. Sondyqtan meditsina mamandary MÁMS boiynsha naýqastardyń suraǵan qyzmetterine joq deýge bolmaidy. Qandai jaǵdai bolmasyn patsienttiń paidasyna sheshilýi tiis. Sondai-aq kz-kelgen turǵyn 1406-nómiri arqyly táýlik boiy saqtandyrý qorynyń koll ortalyǵyna habarlasýlaryna bolady. Jalpy MÁMS boiynsha naýqastyń suraǵan qyzmetine joq deýge bolmaidy», - dedi Qamaljan Nadyrov.
Aita keteiik, mindetti áleýmettik meditsinalyq saqtandyrý júiesi boiynsha qalanyń densaýlyq saqtaý salasyna bólingen qarjy kólemi 35 paiyzǵa artyp otyr.Nátijesinde naýqastarǵa qol jetimdi meditsinalyq qyzmetter sany kóbeiip, meditsinalyq uiymdarda reabilitatsiialyq qyzmet kórsetetin 600-den asa tósek orynǵa ashyldy. 7 uiymda sitýatsiialyq ortalyq ashylyp, onyń jumysy biryńǵai júie arqyly jumys isteýge múmkindik beredi.
