Qazaqstanda mindetti áleýmettik meditsinalyq saqtandyrý aiasynda kórsetiletin meditsinalyq kómekti aqyly negizde bergeni úshin ákimshilik jaýapkershilik kózdeledi. Bul týraly QR Parlamenti Senatynyń jalpy otyrysynda QR Densaýlyq saqtaý ministri Eljan Birtanov aitty, dep habarlaidy QazAqparat.
Densaýlyq saqtaý ministri «Halyq densaýlyǵy jáne densaýlyq saqtaý júiesi týraly» kodeks pen «Keibir zańnamalyq aktilerge densaýlyq saqtaý máseleleri boiynsha túzetýler engizý jóninde» ilespe zań jobasyn tanystyrdy.
«Qoǵamdyq densaýlyq saqtaýdyń deńgeiin kóterýde memlekettiń, jumys berýshiler men azamattardyń ortaq jaýapkershiligin qamtamasyz etý maqsatynda kodeks jobasynda Aikos, GLO, qorqor sekildi temekiniń jańa túrlerin tutynýdy shekteý, sondai-aq sniýster men basqa da shegilmeitin temeki buiymdaryn ákelýge, óndirýge jáne taratýǵa tyiym salý, 21 jasqa tolmaǵan adamdarǵa temeki ónimderin satqany úshin ákimshilik jaýapkershilikti engizý kózdeledi. Vaktsinalardyń adam densaýlyǵyna áserin retteý maqsatynda adam densaýlyǵyna jeńil ziian keltirýge ákep soqqan vaktsinalardy ákelý, satyp alý, tasylmaldaý, saqtaý erejelerin buzǵany úshin, vaktsinalardyń sapasy men qaýipsizdigine saraptama jasaý tártibin buzǵany úshin ákimshilik jaýapkershilik engizý qarastyrylady. Sonymen qatar qyzmetkerlerdiń densaýlyǵyn nyǵaitý jáne aýrýlardyń aldyn alý, meditsinalyq qarap-tekserýler men skrining ótkizý maqsatynda áleýmettik demalystar berý kózdelgen», - dedi Eljan Birtanov.
Osy oraida ol meditsinalyq kómek kórsetýdi uiymdastyrý máselesine toqtaldy. Meditsinalyq kómektiń qaýipsizdigin qamtamasyz etý maqsatynda meditsinalyq kómek kórsetýdiń standartyn ázerleýde biryńǵai tásil qoldanylatyndyǵyn, meditsinalyq qyzmetpen ainalysý litsenziiasy ortalyq deńgeide beriletindigin atap ótti.
«Aýyldyq jerlerde kóshpeli meditsinalyq keshenderdiń, meditsinalyq poiyzdar men qashyqtan meditsinalyq kómek kórsetý quraldarynyń qoljetimdiligi artady. Tegin meditsinalyq kómektiń kólemi jáne mindetti áleýmettik meditsinalyq saqtandyrý asynda kórsetiletin meditsinalyq kómekti aqyly negizde bergeni úshin ákimshilik jaýapkershilik kózdeledi», - dedi Eljan Birtanov.
Sondai-aq ministr densaýlyq saqtaý salasyndaǵy bilim berý jáne ǵylym baǵytynda Dúniejúzilik meditsinalyq bilim berý federatsiiasynyń talaptaryna sáikes bilim alýshylardy jáne túlekterdiń kásiptik daiarlyǵyn táýelsiz baǵalaý; ýniversitet aýrýhanalaryn qurý sharttary men qyzmetiniń qaǵidattaryn odan ári damytý josparlanǵanyn aitty.
«Kodeks jobasy etika máseleleri jónindegi komissiialardyń róli men mártebesin retteidi», - dedi ol.
