Mindetti áleýmettik meditsinalyq saqtandyrý engizilgeli beri joǵary tehnologiialardyń kómegimen jasalatyn meditsinalyq qyzmet kólemi artty. Osy jyldyń 9 aiynda Almaty qalasy boiynsha atalǵan qyzmet túrlerine 5,9 mlrd teńgeden astam qarajat jumsalǵan. Bul týraly MSQ Almaty qalalyq filialy málim etti, dep habarlaidy QazAqparat.
Joǵary tehnologiialyq kómek — meditsinadaǵy kúrdeli, biregei tehnologiialardyń kómegimen, biliktiligi joǵary mamandar tarapynan jasalatyn qyzmet túrleri.
Birinshiden, júrekke jasalatyn operatsiialar; júrek, baýyr, búirek almastyrý; midaǵy isikti sylyp alý; tuqym qýalaityn jáne júielik aýrýlardy, leikoz, endokrindik júiedegi aqaýlardy emdeý; asa kúrdeli hirýrgiialyq ota túrleri jatady. Qazirgi tańda qazaqstandyq dárigerler onyń 70-ke jýyq túrin jasaidy.
Aita keteiik, joǵary tehnologiialar arqyly jasalatyn qyzmetter saqtandyrý paketi sheńberinde kórsetiledi.
«Patsient aýrýhanaǵa josparly túrde jatqyzylyp daiyndalady. Eń aldymen patsient tirkelgen emhanasyna habarlasady. Dáriger ony aýrýhanaǵa jatqyzý biýrosyna tirkeidi. Ol úshin syrqatty qabyldaityn meditsina uiymynyń konsýltatsiiasy talap etiledi. Meditsinalyq qyzmetti jergilikti deńgeide kórsetý múmkin bolmaǵan jaǵdaida komissiia patsientti respýblikalyq klinikalarǵa jiberý múmkindikterin qarastyrady. Qujattar tolyq ári durys rásimdelgen bolsa komissiia eki kún ishinde sheshim shyǵarady. Oń sheshim qabyldanǵannan keiin patsientke joldama berilip, aýrýhanaǵa jatqyzatyn kúndi belgileidi»,– dep túsindirdi MSQ Almaty qalalyq filialy.
2020 jyl basynan beri Almaty qalasyndaǵy №7 klinikalyq aýrýhana joǵary tehnologiialyq qyzmet túrlerin MÁMS paketi sheńberinde kórsete bastady. Búginde aýrýhana joǵary tehnologiialyq qyzmettiń neirohirýrgiia, qan-tamyr hirýrgiiasy, travmatologiia jáne ortopediia, interventsiialyq hirýrgiia, aritmologiia syndy baǵyttar boiynsha 10 shaqty túrin kórsetedi.
Klinika ókili Maqsat Mamyrquldyń sózine súiensek, aýrýhananyń materialdyq-tehnikalyq bazasy quny 1,5mln–6 mln teńgege deiin baratyn otalardy jasaýǵa múmkindik beredi. Onyń ishinde jambas jáne tize býyndaryn almastyrý, júrekke defibrilliator qoiý, bas súiek ishine stentter ornatý, anevrizmaǵa shaldyqqan tamyrlardy biteý syndy ota túrleri bar.
«Bizde kórsetiletin joǵary tehnologiialyq qyzmet kólemi jyl saiyn artyp keledi. Máselen, 2020 jyly bizdiń klinikaǵa saqtandyrý paketi sheńberinde 1 mlrd teńge bólindi. Búgingi kúni 170-ten astam patsient emdeý men diagnostika salasyndaǵy eń zamanaýi tehnologiialardyń igiligin paidalanyp úlgerdi», — deidi Maqsat Mamyrqul.
MSQ Almaty filialy basshysy Tileýhan Ábildaevtyń aitýynsha, atalǵan qyzmetter aqysy meditsinalyq saqtandyrý qarajaty esebinen tólenip otyr.
«Saqtandyrylǵan azamattarǵa beriletin artyqshylyq kóp. Saqtandyrý júiesinde josparly em qajet bolǵan jaǵdaida ÝDZ, KT, MRT syndy qyzmetterden bastap, joǵarǵy tehnologiialyq kómek túrlerine deiingi aralyqtaǵy kóptegen qyzmet túrlerin paidalanýǵa múmkindik bar», — dedi filial basshysy.
