QR Premer-Ministri Asqar Maminniń tóraǵalyǵymen ótken QR Úkimetiniń selektorlyq otyrysynda óńirlerdiń aldaǵy kúzgi-qysqy kezeńge daiyndyǵy máselesi talqylandy, dep habarlaidy "Ult aqparat".
"Óńirlerde 10 606 derbes qazandyq nemese 99,8%, 45 908 turǵyn úi (98,1%) daiyndaldy. 4 943,4 km jylý jelileri (99,1 %), 14 917,1 km (98,7%) sýmen jabdyqtaý jelileri jóndelgen.
Kómir óndirýshi kompaniialar 75,1 mln tonna kómir óndirdi, bul ótken jyldyń uqsas kezeńimen salystyrǵanda 97,2%-dy quraidy (77,2 mln tonna).
Kommýnaldyq qyzmetter úshin tutynýshylardyń bereshegi 11,4 mlrd teńgeni quraidy. Eń kóp debitorlyq bereshek Almaty q. – 2,6 mlrd teńge, Nur-Sultan q. – 1,7 mlrd teńge, Shymkent q. – 1,3 mlrd teńge jáne Mańǵystaý oblysynda – 1,5 mlrd teńge saqtalyp otyr.
2527 balabaqsha (95%), 6656 mektep (99%) jylytý kezeńine daiyndyq týraly aktilerdi aldy. Respýblikalyq mańyzy bar 31 densaýlyq saqtaý nysany boiynsha jylytý maýsymyna ortasha daiyndyq 99%, jergilikti mańyzy bar 5640 nysan boiynsha 97% quraidy.
«Jalpy, jylytý maýsymyna daiyndyq jumystary júrgizilip jatyr. Degenmen, kesteden qalyp qoiý, kommýnaldyq qajettilikter men turǵyndar úshin otyn daiyndaý deńgeiiniń tómen bolýy faktileri oryn alyp otyr. Osyǵan bailanysty ákimderge josparlanǵan jóndeý jumystaryn belgilengen merzimde aiaqtaýdy qamtamasyz etip, qajetti kólemdegi otyndy aldyn ala jetkizýdi tapsyramyn», — dedi A. Mamin.
Úkimet basshysy óńirlerdiń ákimderine eki apta ishinde belgilengen tártipte kómirdi daiarlaý jáne ótkizý pýnktteriniń infraqurylymynyń qazirgi jaǵdaiyn, jetkizilim kestesin, satylatyn kómirdiń baǵasyn jáne sapasyn tekserýdi, Indýstriia jáne infraqurylymdyq damý ministrligine «Qazaqstan Temir joly» UK» AQ-men birlesip, kómir jetkizýge arnalǵan vagondardyń qajetti kólemin qamtamasyz etýdi tapsyrdy.
«Óńirlerde kásiporyndardyń jetkizilgen gaz ben kómir úshin jáne turǵyndardyń kommýnaldyq qyzmetteri úshin debitorlyq bereshegin jabý jumysyn kúsheitý qajet», — dedi Premer-Ministr.
A. Mamin QR Energetika, Indýstriia jáne infraqurylymdyq damý ministrlikterine óńirler ákimdikteriniń aldaǵy jylytý maýsymyna barlyq obektilerdi daiyndaý jumysyn aiaqtaýyn baqylaýda ustaýdy da qadaǵalaýdy tapsyrdy.
Jylytý maýsymyna daiyndyq boiynsha atqarylyp jatqan jumystar týraly QR energetika ministriniń birinshi orynbasary M. Dosmuhambetov, QR indýstriia jáne infraqurylymdyq damý ministri B. Atamqulov, QR bilim jáne ǵylym ministri A. Aimaǵambetov, QR densaýlyq saqtaý vitse-ministri O. Ábishev, Batys Qazaqstan oblysynyń ákimi Ǵ. Esqaliev, Nur-Sultan qalasynyń ákimi A. Kólginov, sondai-aq, Premer-Ministrdiń orynbasary R. Skliar baiandady.
