QR Premer-Ministri Asqar Mamin Mańǵystaý oblysyna jumys sapary aiasynda óńirdiń áleýmettik-ekonomikalyq damýy máseleleri boiynsha keńes ótkizdi jáne óńdeý ónerkásibi, densaýlyq saqtaý, tirshilikti qamtamasyz etý jáne týristik infraqurylym salalaryndaǵy jobalardyń iske asyrylýyn tekserdi. Bul týraly primeminister.kz saity habarlady.
Mańǵystaý oblysynyń ákimi Nurlan Noǵaev, Energetika ministri Maǵzum Myrzaǵaliev, Ekologiia, geologiia jáne tabiǵi resýrstar ministri Serikqali Brekeshev, Indýstriia jáne infraqurylymdyq damý birinshi vitse-ministri Qaiyrbek Óskenbaev, «QazMunaiGaz» AQ» basqarma tóraǵasynyń orynbasary Daniiar Berlibaev jáne taǵy basqalary baiandama jasady.
Biyl 4 qarashada Úkimet Qaýlysymen Mańǵystaý oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi jospary qabyldandy. Onda 2,1 trln teńge somasyna 214 is-sharany iske asyrý kózdelgen.
Munai-gaz sektoryn, óńdeý ónerkásibin, týrizmdi, kólik pen logistikany damytý mindeti qoiyldy. Áleýmettik, injenerlik-kommýnaldyq infraqurylymdy damytý boiynsha jobalar iske asyrylatyn bolady. Qabyldanǵan sharalar esebinen óńir halqynyń 100% sapaly aýyz sýmen qamtamasyz etiledi. Keshendi jospardy iske asyrý 60 myńǵa jýyq jańa jumys oryndaryn qurýdy, ónerkásip kóleminiń 27%, halyqtyń naqty tabysynyń 40% jáne jalpy óńir ekonomikasynyń 32% ósýin qamtamasyz etedi.
Biylǵy jyldyń 10 aiynda Mańǵystaý oblysynda óńdeý ónerkásibiniń kólemi 4,1% ósip, 150,2 mlrd teńgeni qurady, aýyl sharýashylyǵynyń jalpy óniminiń kólemi 17,1 mlrd teńgege jetti (+1%). Negizgi kapitalǵa salynǵan investitsiialar ósimi 0,6% (473,9 mlrd teńge) qurady. Qurylys jumystarynyń kólemi 22,8% (193,8 mlrd teńge) ulǵaidy, 954,1 myń sharshy metr turǵyn úi paidalanýǵa berildi.
Keńes barysynda halyqty taza aýyz sýmen qamtamasyz etý máselesine erekshe nazar aýdaryldy. 2025 jylǵa deiin óńirde jalpy qýaty 286 myń tekshe metr bolatyn sýdy tushylandyrýdyń 9 jobasyn iske asyrý josparlanyp otyr. Onyń ishinde qýaty táýligine 35 myń tekshe metr bolatyn 3 joba 2022 jyldyń birinshi jartyjyldyǵynda paidalanýǵa beriledi.
Úkimet basshysy jylyna 120 myń jup aiaq kiim shyǵaratyn «Zhamal-ai Ltd» aiaq kiim jáne arnaiy kiim shyǵaratyn fabrikanyń jumysymen tanysty.
Aqtaý qalasyndaǵy onkologiialyq dispanserdi aralaý kezinde Premer-Ministrge Mańǵystaý oblysynyń densaýlyq saqtaý júiesiniń damýy týraly baiandaldy.
A. Mamin «MAEK-Qazatomónerkásip» JShS energetikalyq keshenin jańǵyrtý jobalarymen tanysty – 2030 jylǵa deiin JEO-2-de bý-gaz qondyrǵysyn, sondai-aq jiyntyq qýaty táýligine 24 myń tekshe metr eki tushylandyrý qondyrǵysyn salý josparlanýda.
Úkimet basshysy sondai-aq Aqtaý qalasynyń týristik aimaǵyn damytý jobalarynyń iske asyrylýyn tekserdi.
