Úkimet basshysy Asqar Mamin Joshy handy ulyqtaý isindegi jumystyń birneshe baǵytyn atady. Bul jumystar týraly Premer-ministr májilismen Baqytbek Smaǵulǵa bergen jaýabynda tolyǵyraq baian etti, dep habarlaidy "Ult aqparat".
«Birinshiden, jaqyn arada ótetin Nur-Sultan qalalyq onomastikalyq komissiiasynyń otyrysynda elorda kósheleriniń birine Joshy hannyń atyn berý jáne eskertkish ornatý máselesi qaralady. Ekinshiden, Qaraǵandy oblysynyń ákimdigi 2020 jyly Qaraǵandyda Joshy hanǵa eskertkish ornatýdy usynyp otyr. Sonymen qatar, atalmysh ákimdik kelesi jyly Ulytaý aýdanynda Joshy hanǵa eskertkish ornatpaq. Odan bólek, Qazaqstannyń óńirlik deńgeidegi týristik kartasy (TOP-50) obektileriniń tizimin jasaý kózdelgen. Atalǵan tizimde «Ulytaý» tarihi-mádeni kesheni belgilengen, onda jylyna shamamen 10 myń adamdy qabyldai alatyn kórneki oryndar, týristik baǵyttar men mýzei boiynsha ekskýrsiialar týraly aqparatty qamtityn týristik qyzmetter usynylady», - delingen Úkimet basshysynyń jaýabynda.
Asqar Maminniń habarlaýynsha, Mádeniet jáne sport ministrligi Joshy han men Alasha han kesenesiniń aýmaǵyn abattandyrý máselesin pysyqtap jatyr. Jospar boiynsha, Joshy han kesenesine jaqyn ornalasqan Joshy ordasy qalashyǵy zerttelip, Ulytaý óńiriniń arheologiialyq kartasy daiyndalmaq. Sondai-aq, QHR, Iran jáne Túrkiia arhivterinen alynǵan derekter negizinde Saraishyq qalashyǵyna bailanysty qujattar jinaǵy shyǵarylady. Ministrlik odan bólek, Halyqaralyq Túrki akademiiasymen birlesip 2020-2022 jyldary qosymsha birqatar arheologiialyq, etnografiialyq, antropologiialyq, ǵylymi-zertteý jáne basqa da jumystar júrgizýdi josparlap otyr.
«Tórtinshiden, Ulytaý óńiriniń týristik áleýetin damytý úshin aldaǵy jyly «Altyn Orda» ekspeditsiiasyn ótkizý, Ulytaý óńirinde respýblikalyq mańyzy bar Alasha han, Joshy han, tarihi jáne mádeni eskertkishteriniń aýmaǵynda vizit-ortalyǵy men etnoaýyl qurý josparlanýda. Týristik baǵdarlar men soqpaqtar ázirlenip, kempingtik turaqtar, týristerge baratyn jerlerde sanitarlyq-gigienalyq toraptar ornatylady. Baspasóz týrlary aiasynda Joshy hannyń kesenesin shetel jýrnalisteri baratyn obektiler qataryna engizý kózdelgen. Barlyq is-sharalardyń qorytyndysy boiynsha sheteldik BAQ-ta, «The Astana Times» gazetinde aǵylshyn tilinde, Qazaqstannyń shet elderdegi mekemeleriniń internet-resýrstarynda jáne memlekettik organdardyń resmi portaldarynda jariialanymdar shyǵady», - deidi Úkimet basshysy.
Asqar Mamin sondai-aq, Qaraǵandy oblysynyń ákimdigi Qyzylorda, Jezqazǵan, Qaraǵandy, Nur-Sultan, Arqalyq qalalary men Ulytaý aýdany arasyndaǵy joldarǵa jóndeý jumystaryn júrgizetinin tilge tiek etti. Onyń habarlaýynsha, Almaty-Jezqazǵan, Shymkent-Jezqazǵan baǵyttary boiynsha aviareisterdi iske qosý máselesi pysyqtalýda.
«Besinshiden, biyl óńirlik deńgeide Taraz, Atyraý jáne Qaraǵandy qalalarynda ǵylymi konferentsiialar ótkizý josparlanyp otyr. Sharalar 2020 jyly Aqmola oblysynyń Býrabai aýylynda jáne Óskemen, Pavlodar qalalarynda jalǵasady. Qazirgi ýaqytta Mádeniet jáne sport ministrligi Ulytaý óńiriniń tarihi jáne mádeni kesenelerin IýNESKO dúniejúzilik murasynyń tizimine engizý máselesin pysyqtaýda», - dep habarlaidy Asqar Mamin.
Eske sala ketsek, osyǵan deiin Májilis depýtaty Baqytbek Smaǵul elordadaǵy kórnekti kóshelerdiń birine Joshy han esimin berýdi usynǵan bolatyn. Onyń sózine qaraǵanda, Altyn ordanyń 750 jyldyǵy aiasynda Joshy han, Alasha han kesenelerine keshendi túrde arheologiialyq, etnografiialyq zertteý jumystary júrgizilgeni jón. Kesenedegi tańbalar men jazýlardy tarihi, tildik turǵyda zerttep, restavratsiia jáne konservatsiia jumystaryn júrgizý qajet.
