QR Premer-Ministri Asqar Mamin Bilim jáne ǵylym, Densaýlyq saqtaý ministrlikterine, óńirlerdiń ákimdikterine jańa oqý jylynyń dástúrli formatta bastalatyndyǵyna bailanysty birqatar tapsyrma berdi, dep habarlaidy QazAqparat.
«Jańa oqý jylynda mektepke deiingi jáne orta bilim berý uiymdarynda, sonymen qatar kolledjder men joǵary oqý oryndarynda oqý shtattyq rejimde qamtamasyz etilsin. Bilim ministrligi ákimdiktermen birlesip, árbir mektepke dástúrli formatta oqý boiynsha naqty usynymdardy jetkizsin. Osy jylǵy 25 tamyzǵa deiin meditsinalyq qarsy kórsetilimderi bar adamdardan basqa, pedagogtar men tehpersonaldy vaktsinalaýmen 100 paiyz qamtamasyz etsin», - dedi Asqar Mamin Úkimet otyrysynda.
Sonymen qatar Úkimet basshysy mektepterdi sanitariialyq talaptarǵa sáikes qabyldaýdy osy jylǵy 20 tamyzǵa deiin aiaqtaý qajettigin eskertti.
«Barlyq bilim berý uiymdarynda pedagogtar, qyzmetkerler men ata-analar úshin «ASHYQ» júiesin engizý qajet. 25 tamyzǵa deiin oqýlyqtar kestege sáikes tolyǵymen jetkizilýi kerek. Bul, eń aldymen, oqýlyqtarmen qamtamasyz etý máselesi boiynsha Kesteden keshigip otyrǵan 2 óńirge – Pavlodar jáne Túrkistan oblystaryna qatysty»,- dedi Premer-Ministr.
