Qazaqstannyń Premer-ministri Asqar Mamin aldaǵy jumystyń negizgi baǵyttaryn atady, habarlaidy Sputnik Qazaqstan tilshisi.
"Ortalyq sailaý komissiiasy kezekten tys prezident sailaýynyń qorytyndysyn jariialady. Qazaqstan Respýblikasynyń Tuńǵysh Prezidenti Nursultan Ábishuly Nazarbaevtyń tóraǵalyǵymen ótken Nur Otan sezinde usynylǵan úmitker - Qasym-Jomart Kemeluly Toqaev jeńiske jetti. Halyqtyń qoldaýy arqasynda elbasynyń strategiialyq baǵdarynyń sabaqtastyǵy qamtamasyz etiledi" - dedi Mamin úkimettiń búgingi otyrysynda.
Úkimet basshysynyń aitýynsha, jańadan sailanǵan prezidenttiń sailaýaldy baǵdarlamasyn tolyǵymen iske asyrý - ministrler kabinetiniń ortaq mindeti.
"Sonyń ishinde ekonomika men infraqurylymnyń turaqty damýy, qoljetimdi baspanamen qamtamasyz etý, sonymen qatar, bilim berý men densaýlyq saqtaý salasyn jaqsartý arqyly halyqtyń tabysyn, ómir súrý sapasyn arttyrý bar. Sondai-aq, jańa jumys oryndaryn ashý úkimettiń basty mindetteriniń biri. Ol jańa óndiristiń ashylýyna tikelei bailanysty. Muny investitsiiasyz júzege asyrý múmkin emes", - dedi Mamin.
Premer-ministr barlyq memlekettik organ basshylary men ákimderge investitsiiany kóbirek tartýǵa, sondai-aq, shaǵyn jáne orta biznesti jan-jaqty damytýǵa tapsyrma berdi.
"Osy jumysty úzdiksiz júrgizý kerek. Jumys bolsa, halyqtyq turmysy jaqsarady. Demek, narazylyq ta bolmaidy degen sóz. Memleket basshysynyń sailaýaldy tuǵyrnamasy men strategiialyq mindetterin tiimdi júzege asyrýdyń arqasynda áleýmettik máselelerdi sheshýge múmkindik jasalady. Osy mindetti oryndaý úshin bar kúsh-jigerimizdi salýymyz qajet", - deidi Mamin
