QR Úkimeti 8 trln teńgege 415 investitsiialyq jobany iske asyrýdy kózdeidi. Bul týraly QR Parlamenti palatalarynyń birlesken otyrysynda Premer-Ministr Asqar Mamin aitty, dep habarlaidy "Ult aqparat".
«2021 jyldyń qorytyndysy boiynsha Úkimettiń aldynda ekonomika ósimin 3,5-4,0 paiyz deńgeiinde qamtamasyz etý jáne 1,2 mln adamdy jumyspen qamtý sharalaryn iske asyrý mindeti tur. Bul halyqtyń naqty tabysyn 5 paiyz arttyrýǵa múmkindik beredi. Úkimet sonymen qatar 8 trln teńgege 415 investitsiialyq jobany iske asyrýdy kózdep otyr», - dedi Asqar Mamin.
Úkimet basshysynyń aitýynsha, biyl 17 mln sharshy metr turǵyn úidi paidalanýǵa berý, 200 mektep salý jáne 30 medpýnkt ashý, 6 myń shaqyrym avtojol jóndeý jáne salý, halyqty aýyz sýmen qalada – 98 paiyz jáne aýylda – 91,8 paiyz qamtamasyz etý josparlanǵan.
«Agroónerkásiptik keshenniń áleýetin paidalaný úshin 1 050 shaqyrym kanaldy jóndeý josparlanyp otyr. Bul sýarylatyn jerlerdi 78 myń gektarǵa ulǵaitýǵa múmkindik beredi», - dedi Premer-Ministr.
