QR Premer-Ministri Asqar Mamin jumys sapary aiasynda Túrkistan qalasyndaǵy nysandardyń salyný barysyn tekserdi, djep habaralidy "Ult aqparat" Úkimet basshysynyń baspasóz qyzmetine silteme jasap.
Premer-Ministr men Túrkistan oblysynyń ákimi Ómirzaq Shókeev Túrkistan qalasyndaǵy jańa áýejaidyń jáne oǵan aparatyn avtomobil jolynyń salyný barysymen tanysty. Nysan oblys ortalyǵynan 16 shaqyrym qashyqtyqta ornalasqan jáne biyl qyrkúiek aiynda paidalanýǵa beriledi. Terminaldyń ótkizý qabileti jylyna 3 mln jolaýshyny quraidy dep josparlanýda.
A. Mamin Kongress-holl, Oqýshylar saraiy, ákimdiktiń keńseler ǵimaraty, basseini bar sport kesheni, 7 myń orynǵa shaqtalǵan stadion, drama teatry, oblystyq ǵylymi-ámbebap kitaphana, attraktsiondary bar qalalyq saiabaq, «Uly dala eli» ortalyǵy jáne Q. A. Iassaýi mýzeii ǵimarattarynyń qurylys alańdaryn aralady, sondai-aq Uly Jibek joly Ulttyq qolónershiler ortalyǵy men kelý ortalyǵynyń ǵimarattarynyń qaita jóndelý barysyn tekserdi.
Úkimet basshysy árqaisysy 120 bólmeden bolatyn «Rixos Turkestan» jáne «Hampton by Hilton» qonaq úileriniń, sondai-aq «Sembol construction» túrik kompaniiasy salyp jatqan, investitsiia kólemi 80 mlrd. teńgeni quraityn «Kerýen-sarai» kópfýnktsionaldy týristik kesheniniń qurylysy barysymen tanysty. Bul qonaq úi-týristik nysandardyń barlyǵyn biyl paidalanýǵa berý kózdelgen.
«Tuńǵysh Prezident – Elbasy Nursultan Ábishuly Nazarbaev jáne Memleket basshysy Qasym-Jomart Kemeluly Toqaev Túrkistan qalasynyń damýyna erekshe kóńil bóledi. Biyl kúzde munda Túrki tildes memleketterdiń yntymaqtastyǵy keńesiniń sammitin ótkizý josparlanǵan. Osyǵan orai barlyq qajetti nysandardyń qurylysynyń ýaqytyly ári sapaly aiaqtalýyn qamtamasyz etý qajet», — dedi A. Mamin.
