Memleket basshysy Premer-Ministr Asqar Mamindi qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa biylǵy Joldaýdy júzege asyrý sharalary týraly baiandaldy.
Premer-Ministr Qazaqstan Prezidentiniń Joldaýyndaǵy barlyq baǵytty júzege asyrý úshin 7 qyrkúiekke deiin Jalpyulttyq jospar ázirlenip, Memleket basshysyna bekitýge engiziletinin jetkizdi. Atalǵan jospar ekonomikanyń ornyqtylyǵy men básekege qabilettiligin qamtamasyz etýge baǵyttalǵan sharalardy, azamattardyń ál-aýqatyn jaqsartýdy, densaýlyq saqtaý júiesi men bilim berý sapasynyń tiimdiligin arttyrýdy jáne aimaqtyq saiasatty jetildirýdi qamtidy.
Asqar Mamin elimizdegi sanitarlyq-epidemiologiialyq ahýaldyń jaqsaryp kele jatqanyn málimdedi. Onyń aitýynsha, sońǵy eki aptanyń ishinde virýstyń taralý indeksi 1-den asqan joq, búgingi kórsetkish – 0,87 bolyp tur. Juqpaly aýrýlar jáne jansaqtaý bólimderindegi naýqastar sany 40 paiyzǵa azaiǵan. Qazirgi ýaqytta 6,7 million adam vaktsinanyń birinshi komponentin qabyldasa, 5,5 million azamat ekpeni tolyq alǵan.
Sonymen qatar Qasym-Jomart Toqaevqa importqa táýeldilikti tómendetýge jáne áleýmettik mańyzy bar azyq-túlik taýarlary baǵasynyń qubylýyna jol bermeýge qatysty aldaǵy ýaqytta atqarylatyn jumystar jóninde, egin jinaý naýqanynyń barysy men elimizdegi ekonomikalyq damýdyń basqa da ózekti máseleleri týraly aityldy.
Kezdesý sońynda Prezident Premer-Ministrge Joldaýdy tolyq júzege asyrýǵa baǵyttalǵan birqatar naqty tapsyrma berdi. Memleket basshysy elimizdegi áleýmettik-ekonomikalyq jaǵdaidy túbegeili jaqsartý úshin Úkimet pen aimaq ákimderiniń úilesimdi ári tiimdi jumysy asa mańyzdy ekenin atap ótti.
