Qasym-Jomart Toqaev Premer-Ministr Asqar Mamindi qabyldady, dep habarlaidy "Ult aqparat" Aqordaǵa silteme jasap.
Memleket basshysyna Arys qalasyndaǵy qaita qalpyna keltirý jumystarynyń barysy jáne Túrkistandaǵy jańa infraqurylym nysandarynyń qurylysy jóninde baiandaldy. Budan bólek, Prezidentke tartylatyn shetel investitsiialarynyń aǵymdaǵy kórsetkishteri, Eýraziialyq ekonomikalyq odaq aiasynda yqpaldastyqty damytý, 2020 jyly Kókshetaý qalasynda ótetin Qazaqstan men Resei óńiraralyq yntymaqtastyǵy forýmyna daiyndyq týraly málimet berildi.
Prezident Úkimettiń keńeitilgen otyrysynda berilgen tapsyrmalardyń tiimdi júzege asyrylýyn, sondai-aq Arys qalasyndaǵy barlyq qalpyna keltirý jumystarynyń ýaqytyly jáne sapaly oryndalýyn qamtamasyz etýdi tapsyrdy.
Sońynda Qasym-Jomart Toqaev Asqar Maminge elimizdiń áleýmettik-ekonomikalyq jaǵdaiyn arttyrý jóninde birqatar naqty tapsyrma berdi.
