QR Premer-Ministri Asqar Mamin Tashkent qalasyna sapary aiasynda Shanhai Yntymaqtastyq Uiymyna (ShYU) múshe memleketterdiń Úkimetter basshylary keńesiniń (ÚBK) 18-shi otyrysyna qatysyp, onda Uiymǵa qatysýshy elderdiń saýda-ekonomikalyq, tsifrlyq, kólik jáne basqa da salalardaǵy naqty yntymaqtastyǵyn nyǵaitý boiynsha birqatar bastamalar kóterdi, dep habarlaidy "Ult aqparat" primeminister.kz saityna silteme jasap.
Shaǵyn quramdaǵy kezdesý barysynda A. Mamin ShYU Bankin jáne ShYU damytý qoryn qurý boiynsha jumystardy jandandyrýdy, Uiymǵa múshe memleketterdiń ózara eseptesýlerinde ulttyq valiýta úlesin arttyrý jónindegi «Jol kartasyn» birlesip ázirleýdi, ShYU-ǵa múshe memleketterdiń qarjy ministrleri men ortalyq bankteriniń basshylarynyń kezdesýlerin qaita jańǵyrtýdy usyndy.
Qazaqstan Úkimetiniń basshysy taraptardyń kólik-logistikalyq baǵyttaǵy nátijeli jumystaryn atap ótti. A. Mamin baqylaýshy memleketterdiń ShYU-ǵa múshe memleketterdiń temirjol salasyndaǵy ózara is-qimyly tetikterine qatysýyn keńeitýdi, júkterdi avtomobilmen tasymaldaý úshin ruqsat blankterin berýdiń avtomattandyrylǵan júiesin engizýdi jedeldetýdi jáne ShYU-ǵa múshe memleketterdiń birlesken Avtomobil joldaryn damytý baǵdarlamasyn bekitýdi usyndy.
QR Premer-Ministri ShYU-ǵa múshe memleketterdiń kópjaqty saýda-ekonomikalyq yntymaqtastyǵy Baǵdarlamasyn is júzine asyrý jumystaryna kásipkerlerdiń ulttyq palatalaryn tartý qajettigi týraly málimdedi, sondai-aq ShYU Hatshylyǵynyń halyqaralyq qarjy mekemelerimen bailanystarynda ilgeriletý úshin ShYU investitsiialyq jobalarynyń Biryńǵai tizimin ázirleýdiń mańyzdylyǵyn aitty.
Keńeitilgen quramdaǵy otyrysta Qazaqstan Úkimetiniń basshysy ShYU, EAEO, ASEAN jáne EO arasyndaǵy kópjaqty dialog formatynda saýda-ekonomikalyq yntymaqtastyqty damytý qajettigin basa aitty.
«Qazaqstannyń Tuńǵysh Prezidenti - Elbasy Nursultan Nazarbaevtyń Eýropa men Aziiadaǵy iri aimaqtyq birlestiktermen jáne jobalarmen seriktestik qarym-qatynastar ornatý boiynsha «Úsh dialog» týraly bastamasy erekshe nazar aýdarýǵa turarlyq», - dedi A. Mamin.
Qazaqstan Úkimetiniń basshysy ShYU-ǵa qatysýshy memleketterdi AHQO alańyn jańa qarjy ónimderi men tehnologiialaryn testileý úshin paidalanýǵa shaqyrdy.
«Búginde Qytai, Resei jáne Ózbekstan qarjy tehnologiialary kompaniialary osyndai múmkindikti paidalanyp úlgerdi», - dep atap ótti QR Premer-Ministri.
A. Mamin Tsifrlyq ekonomikany damytý jónindegi keńesti qurý bastamasyn kóterdi.
«Bul keńes 5G, «Aqyldy qalalar», aýqymdy derekter, blokchein, tsifrlyq aktivter tárizdi jańa tehnologiialyq elementterdi bizdiń elderimizde engizý boiynsha ózara tiimdi seriktestikti damytý, sondai-aq data-ortalyqtardy salý jáne ornalastyrý, derekter tranzitin damytý, tsifrlyq qyzmetterdiń jahandyq naryǵyna qatysý alańyna ainalar edi», - dedi QR Premer-Ministri.
Úkimet basshysy ShYU elderin Qazaqstanda qurylǵan «Jasyl» tehnologiialardy damytý jáne investitsiialyq jobalardyń halyqaralyq ortalyǵyn turaqty damý strategiiasyn damytý jáne ozyq tájiribelerdi almasý úshin paidalanýǵa shaqyrdy.
«Qazaqstan Prezidenti Qasym-Jomart Toqaev «Shanhai Yntymaqtastyq Uiymynyń róli men áleýeti áli túgesilgen joq. Bul Uiymnyń bolashaǵy zor» dep sanaidy», - dedi A.Mamin.
ShYU ÚBK shaǵyn jáne keńeitilgen quramdaǵy otyrystarynyń qorytyndylary boiynsha 14 qujat qabyldandy, onyń ishinde birlesken kommiýnike, Kópjaqty saýda-ekonomikalyq yntymastastyq baǵdarlamasynyń jańa redaktsiiasy, ShYU-ǵa múshe memleketterdiń temirjol kóligi salasyndaǵy temirjolda ákimshilendirýdegi Ózara is-qimyl tujyrymdamasy, ShYU Ekonomikalyq saraptaý ortalyqtary konsortsiýmynyń reglamenti, ShYU Qalalarynyń ekologiialyq qolailylyǵyn damytý baǵdarlamasy jáne t.b. bar.
