QR Premer-Ministri Asqar Mamin Parlamenttiń qos palatasy depýtattarynyń birlesken otyrysynda Úkimettiń 2019 jylǵy jumysy jáne ekonomikany odan ári damytý boiynsha qabyldanyp jatqan sharalar týraly esep berdi, dep habarlaidy primeminister.kz.
Úkimet basshysy munaiǵa álemdik baǵanyń tómendeýine jáne syrtqy ekonomikalyq koniýnktýranyń nasharlaýyna qaramastan, 2019 jyldyń qorytyndysy boiynsha Qazaqstan ekonomikasynyń sońǵy 6 jyldaǵy eń joǵary ósimi – 4,5%-ǵa qol jetkizilgenin atap ótti. Sonymen qatar ósimniń 85%-y shikizattyq emes salalardy damytý esebinen qamtamasyz etildi.
Ekonomika ósiminiń negizgi draiverleri — óńdeý ónerkásibi (4,5%), qurylys (12,9%), kólik (5,1%) jáne saýda (7,6%) boldy. Negizgi kapitalǵa calynǵan investitsiialar 8,5%-ǵa, onyń ishinde jeke investitsiialar 9,5%-ǵa ósti. Syrtqy saýda ainalymy $97 mlrd deiin ósti, syrtqy saýdanyń oń saldosynyń ósimi $19 mlrd qurady. Infliatsiia josparlanǵan dáliz sheginde 5,4%-dy qurady. Eńbek naryǵynda turaqtylyq saqtaldy. Jumyssyzdyq deńgeii 4,8% boldy. Eń tómengi jalaqy 1,5 ese ósti.
Osy jyldyń 5 aiynyń qorytyndysy boiynsha Qazaqstannyń JIÓ 1,7%-ǵa tómendedi. Bul rette ekonomikanyń negizgi salalarynda ósim qamtamasyz etildi. Taýarlar óndirisi 4,8%-ǵa artty.
«Qazirgi jaǵdaida Úkimettiń negizgi mindeti – ekonomika ósiminiń oń qarqynyna shyǵý úshin qajetti jaǵdailardy jasaý. Ol úshin elimizdegi áleýmettik-ekonomikalyq turaqtylyqty saqtaý boiynsha aýqymdy sharalar qabyldanyp jatyr», — dedi A. Mamin.
Úkimet basshysy tótenshe jaǵdai kezinde ekonomikany turaqtandyrýǵa jáne halyqty qoldaýǵa baǵyttalǵan jedel ári shuǵyl sharalardyń 2 toptamasy (biylǵy 23-30 naýryz aralyǵy) qabyldanǵanyn atap ótti. Áleýmettik áljýaz toptarǵa qarjylyq kómek kórsetildi, onyń ishinde qajetti dári-dármektermen jáne azyq-túlikpen qamtamasyz etildi, bank nesieleri boiynsha tólemder ýaqytsha toqtatyldy, salyq jáne basqa da mindetti tólemderdi tóleý merzimi keiinge shegerildi. Daǵdarys jaǵdaiynda jeke sektordyń turaqtylyǵyn qamtamasyz etý úshin ShOB-ty jeńildikpen nesieleý jáne biznesti aýqymdy yntalandyrý sharalary qabyldandy.
Memlekettik baǵdarlamalar aiasynda jumyspen qamtý sharalarymen osy jyldyń sońyna deiin 1,2 mln-nan astam azamat qamtylatyn bolady. Jumyspen qamtýdyń jańa jol kartasy aiasynda 6,5 myńnan astam joba iske asyrylady. Bul 255 myń jumys ornyn ashýǵa jáne injenerlik-kommýnikatsiialyq jáne áleýmettik infraqurylymdy jańǵyrtý arqyly óńirlerde halyqtyń turmys sapasyn jaqsartýǵa múmkindik beredi. Biznestiń jol kartasy ekonomikanyń aralas salalarynda 100 myń jańa turaqty jumys ornyn qurýǵa negiz bolady.
Úkimet 2020 jylǵa arnalǵan Ekonomikalyq ósimdi qalpyna keltirý jónindegi keshendi jospardy ázirlep, belsendi túrde iske asyrýda. Ol iskerlik belsendilikti yntalandyrýǵa, jumyspen qamtýdy jáne halyqtyń tabysyn qoldaýǵa baǵyttalǵan naqty salalyq sharalardy qamtidy. Keshendi jospardy iske asyrý úshin Parlament qysqa merzimde zańnamaǵa shuǵyl túzetýler toptamasyn qarastyryp jatyr.
Biylǵy 1 tamyzǵa deiin Ekonomikalyq ósimdi qalpyna keltirý jónindegi memlekettik komissiianyń jumysy aiasynda 2025 jylǵa deiingi Strategiialyq jospardyń jańa redaktsiiasy ázirlenedi. Ol elimizdiń jańa ekonomikalyq baǵdarynyń negizgi baǵyttaryn anyqtaidy.
«Jańa ekonomikalyq shynaiylyq orta merzimdi perspektivada eldiń sapaly ári turaqty damýyn qamtamasyz etý úshin ekonomikalyq saiasatqa túbegeili ózgeristerdi engizýdi talap etedi», — dep atap ótti A. Mamin.
