Búgin Tashkent qalasynda QR Premer-Ministri Asqar Mamin Ózbekstan Prezidenti Shavkat Mirzieevpen kezdesti, dep habarlaidy "Ult aqparat" Úkimet basshysynyń baspasóz qyzmetine silteme jasap.
«QR Tuńǵysh Prezidenti – Elbasy Nursultan Nazarbaev Sizben birge Qazaqstan men Ózbekstan arasyndaǵy ekijaqty qatynastardy strategiialyq yntymaqtastyqtyń jańa deńgeiine shyǵarýǵa negiz saldy. Memleket basshysy Qasym-Jomart Toqaev syrtqy saiasattyń sabaqtastyǵyn saqtaidy jáne ekijaqty yntymaqtastyqty nyǵaitýǵa erekshe nazar aýdarady», — dedi A. Mamin.
Úkimet basshysy búginde Qazaqstan–Ózbekstan qarym-qatynasy yntymaqtastyqtyń sapaly joǵary deńgeiine shyqqanyn atap ótti. Muny barlyq derlik deńgeilerdegi ózara árekettesý qarqyny dáleldeidi.
Kelissózder barysynda saýda-ekonomikalyq, investitsiialyq, energetikalyq, tranzittik-kólik, qurylys, toqyma, avtomobil jasaý, mádeni-gýmanitarlyq, týristik jáne basqa da salalardaǵy yntymaqtastyqty odan ári damytý boiynsha keń aýqymdy máseleler talqylandy.
2019 jylǵy 9 aidyń qorytyndysy boiynsha QR men ÓR arasyndaǵy ózara saýda-sattyq 25%-ǵa $2,6 mlrd deiin ósti. Aldaǵy jyldary taýar ainalymyn $5 mlrd deiin jetkizý josparda bar.
Erteń QR Premer-Ministri Asqar Mamin Shanhai Yntymaqtastyq Uiymyna (ShYU) múshe memleketterdiń Úkimet basshylary keńesiniń (ÚBK) otyrysyna qatysady.
