Aýyl sharýashylyǵy ministrligi men óńirler ákimderiniń aldynda kóktemgi egis jumystaryn sapaly júrgizý mindet tur. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Kóktemgi egis jumystaryn sapaly ári ýaqtyly júrgizý eldiń azyq-túlik qaýipsizdigin qamtamasyz etýdiń mańyzdy faktorlarynyń biri bolyp tabylady. Byltyr pandemiiaǵa qaramastan egis jumystary óte joǵary deńgeide júrgizildi. Agrotehnologiialar dál saqtalyp, tyńaitqyshtar men ósimdikterdi qorǵaý quraldary ýaqtyly salyndy. Bul mol astyq jinaýǵa múmkindik berdi», - dedi Úkimet basshysy.
Onyń atap ótýinshe, biyl Úkimet kóktemgi egisti qarjylai jáne materialdyq-tehnikalyq qamtamasyz etý boiynsha barlyq qajetti sheshimderdi qabyldady. Biýdjettik kredit berýmen qatar biylǵy jyly aýyl sharýashylyǵy ónimderin forvardtyq satyp alýdy júzege asyrý úshin bólingen qarajattyń kólemi 24,5 mlrd teńgeden 45,3 mlrd teńgege deiin artty.
«Sondyqtan osy mehanizmdi paidalana otyryp, áleýmettik mańyzy bar azyq-túlik taýarlaryn satyp alýǵa erekshe nazar aýdarý kerek. Jalpy Aýyl sharýashylyǵy ministrligi men óńirler ákimderiniń aldynda barlyq kóktemgi egis jumystaryn sapaly júrgizý boiynsha naqty mindet tur. Osy máseleni erekshe baqylaýda ustaýdy tapsyramyn. Ekologiia ministrligi Aýyl sharýashylyǵy ministrligimen jáne ákimdiktermen birlesip, respýblikanyń ońtústik óńirlerinde, onyń ishinde uzaq merzimdi perspektivada sýarmaly sýmen turaqty qamtamasyz etý boiynsha sharalar qabyldasyn», - dedi Asqar Mamin.
