QR Premer-Ministri Asqar Mamin Nur-Sultan qalasyn damytýdyń keshendi josparyn iske asyrý barysyn baqylaý jónindegi memlekettik komissiia otyrysyn ótkizdi. Bul týraly Úkimettiń baspasóz qyzmeti málim etti, dep habarlaidy "Ult aqparat".
«Elbasynyń tapsyrmasy boiynsha elordany damytýdyń ózekti máselelerin sheshý, onyń ishinde bilim berý, densaýlyq saqtaý nysandaryn salý jáne kólik infraqurylymyn damytý boiynsha Nur-Sultan qalasyn damytýdyń bes jyldyq Keshendi jospary daiyndalyp, bekitildi», - dedi QR Premer-Ministri.
Sondai-aq ol Qasym-Jomart Toqaevtyń elimizdiń bas qalasynyń damýyna úlken mán beretinin jáne Úkimetke birqatar mindetterdi júktegenin aitty.
Memlekettik komissiia otyrysy barysynda qalanyń jiyntyq qurylysy jónindegi keshendi jospardy iske asyrý, gazben jabdyqtaý, qala mańyn damytý jáne úlestik qurylys máseleleri talqylandy.
Keshendi jospardy iske asyrý jáne Nur-Sultan qalasyn damytýdyń ózekti máseleleri týraly qala ákimi A. Kólginov baiandady.
Beiindi baǵyttar boiynsha Ulttyq ekonomika ministri R. Dálenov, Densaýlyq saqtaý ministri E. Birtanov, Bilim jáne ǵylym ministri A. Aimaǵambetov, Aýyl sharýashylyǵy ministri S. Omarov, Indýstriia jáne infraqurylymdyq damý ministri R. Skliar, Ekologiia, geologiia jáne tabiǵi resýrstar ministri M. Myrzaǵaliev, Ádilet ministri M. Beketaev, Energetika birinshi vitse-ministri M. Dosmuhambetov baiandady.
«Elordada turǵyn úige suranys joǵary kezde turǵyn úi qurylysynyń qarqyny tómendemeýi tiis», - degen Asqar Mamin, 6 aidyń qorytyndysy boiynsha qurylys qarqyny 20%-ǵa tómendegenin aitty.
«Elordada turǵyn úige suranys joǵary kezde turǵyn úi qurylysynyń qarqyny tómendemeýi tiis», - degen Asqar Mamin, 6 aidyń qorytyndysy boiynsha qurylys qarqyny 20%-ǵa tómendegenin aitty.
Jalpy, jarty jyldyń qorytyndysyna sáikes negizgi kórsetkishter boiynsha artta qalýshylyq baiqalýda: negizgi kapitalǵa investitsiialar 20%, turǵyn úidi paidalanýǵa berý 33% tómendedi.
«Úkimet elordany keshendi damytýdy iske asyrý úshin barlyq qajetti sharalardy qabyldady. Elorda áleýmettik-ekonomikalyq damý kórsetkishterine qol jetkizý boiynsha barlyq óńirlerge úlgi bolýy tiis», - dedi Asqar Mamin.
Jekelegen másele - Nur-Sultan qalasynyń tóńiregin damytý. Elorda ákimdigi biyl 9 jobany iske asyrýdy josparlady, sonyń ishinde áleýmettik, mádeni mańyzdaǵy nysandar, gazdandyrý nysandaryn, injenerlik jeliler salý máseleleri bar.
«Nur-Sultan qalasynyń tóńiregindegi máselelerdi sheshýge úsh jyldyq kezeńge 22,5 mlrd teńge qarastyrylǵan, osy qarajatty qala tóńireginde ómir súretin azamattardyń turmys sapasyn arttyrýǵa jumsaý qajet», - dep Asqar Mamin basa aitty.
Úkimet basshysy keńes qorytyndysyn shyǵara otyryp, birqatar naqty tapsyrmalar berdi.
Elorda ákimdigine múddeli memlekettik organdarmen birlesip, keshendi jospardyń is-sharalaryn ýaqytyly ári sapaly iske asyrý, elorda tóńireginde nysandar salýdyń JSQ ázirleý boiynsha qajetti sharalardy qabyldaý, úlestik qurylystaǵy problemalyq nysandardyń qurylysyn aiaqtaýdy jedeldetý tapsyryldy.
QR Premer-Ministri Nur-Sultan qalasy ákimdiginiń negizgi jumysy gazben jabdyqtaý, kósheni jaryqtandyrý, nóser kanalizatsiiasy, áleýmettik nysandar salý, abattandyrý, kólik jelilerin damytý máselelerin jedel túrde sheshý ekenin aitty.
