Qazaqstan Úkimet álemdik ekonomikada oryn alǵan kúrdeli jaǵdaiǵa qarsy áreket etýdiń birneshe nusqasyn ázirledi.
Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Ózderińizge málim, álemdegi ekonomikalyq jaǵdai kúrdeli bolyp tur. Syrtqy ekonomikada koniýnktýranyń teris serpini baiqalyp otyr. Birqatar iri halyqaralyq qarjy uiymdary men damý institýttary biylǵy jyly álemdik ekonomika ósimi boljamynyń tómendegenin habarlady. OPEK+ munaidyń negizgi eksporttaýshy elderi arasyndaǵy munai óndirýdi shekteý boiynsha ortaq kelisimge qol jetkizbeýi sebebinen munaidyń álemdik baǵasy aitarlyqtai tómendeýine alyp keldi», - dedi Úkimet basshysy.
Degenmen, onyń aitýynsha, ulttyq ekonomikadaǵy jaǵdai biylǵy 2 aidyń nátijesi boiynsha 3,3 paiyz deńgeiinde saqtalyp otyr. Ekonomikanyń shikizattyq emes salalarynda ósim baiqalýda. Óńdeýshi ónerkásip 9,4, onyń ishinde kólik jasaý 72,2, jeńil ónerkásip 12,4, munai óńdeý 9,8 jáne metallýrgiia 8,2 paiyzǵa ósti. Taý-ken salasy 4,7, sonyń ishinde metall kenderin óndirý 8,8 jáne tabiǵi gaz óndirý 4,1 paiyzǵa artty. Sonymen qatar qurylys 11,9 jáne bailanys 10,7 paiyzǵa ósim kórsetti. Infliatsiia nysanaly 6-8 paiyz sheginde saqtalyp otyr. Negizgi kapitalǵa investitsiialar 11,6 paiyzǵa, al jeke investitsiialar 12,1 paiyzǵa ulǵaidy.
«Bul rette qalyptasqan jaǵdaidy eskere otyryp, Prezidenttiń tapsyrmasy boiynsha Shuǵyl áreket etý shtaby jáne barlyq óńirlerde tiisti shtabtar quryldy. Úkimet osy jaǵdai odan ary qarai damýynyń birneshe nusqasyn ázirledi. Ár nusqa qajetti qarjy resýrstarmen qamtamasyz etilgen. Bul sharalardyń maqsaty halyqtyń ál-aýqatynyń saqtalýyn qamtamasyz etý bolyp sanalady. Azamattarymyzdyń eshqaisysyn qiyn jaǵdaida qaldyrmaimyz», - dedi Asqar Mamin.
