QR Premer-Ministri Asqar Mamin Qazaqstan aýmaǵynda koronavirýstyń taraýyna jol bermeý jáne onyń aldyn alý sharalary jóninde keńes ótkizdi, - dep habarlaidy primeminister.kz.
Densaýlyq saqtaý ministri E.Birtanov, indýstriia jáne infraqurylymdyq damý ministri B. Atamqulov, mádeniet jáne sport ministri A. Raiymqulova, syrtqy ister ministriniń birinshi orynbasary Sh. Nuryshev, Qazaqstannyń bas sanitarlyq dárigeri J. Bekshin, QR Ulttyq qaýipsizdik komitetiniń Shekara qyzmetiniń direktory D. Dilmanov, sondai-aq Almaty jáne Shyǵys Qazaqstan oblystarynyń basshylyǵy oryn alǵan jaǵdai men áreket etý sharalary týraly baiandady.
«QR Prezidenti Qasym-Jomart Toqaev Qytaidan Qazaqstan aýmaǵyna koronavirýstyń taralýyna jol bermeý boiynsha sheshýshi uiymdastyrý sharalaryn qabyldaýdy tapsyrdy», — dedi A. Mamin.
Keńes qorytyndysy boiynsha Úkimet basshysy kelesi keshendi aldyn alý sharalaryn qabyldaýdy tapsyrdy:
- Memlekettik shekaradan ótkizý beketterinde, onyń ishinde áýe, avtokólik jáne temir jol kóligi nysandarynda sanitarlyq-epidemiologiialyq jáne kóshi-qon baqylaýyn kúsheitý;
- QHR-dan kelgen barlyq adamdarǵa turǵylyqty mekenjaiy boiynsha meditsinalyq baqylaý ornatý;
- Epidemiologiialyq ahýal nasharlaǵan jaǵdaida halyqqa qajetti kómek kórsetetin meditsinalyq uiymdardyń daiyndyǵyn qamtamasyz etý;
- Qytaiǵa qyzmettik is-saparlardy shekteý, sondai-aq jeke ister men týristik maqsattarda barmaýǵa keńes berý;
- QHR-dan keletin tranzittik jolaýshylarǵa QR aýmaǵyna 72 saǵattyq vizasyz kelý rejimin ýaqytsha toqtatý;
- «Qorǵas» ShYHO qazaqstandyq bóliginiń jumysyn ýaqytsha toqtatý;
- QHR aýmaǵyndaǵy qazaqstandyq azamattarmen olarǵa konsýldyq jáne ózge de kómek kórsetý maqsatynda jumysty jandandyrý;
- Memlekettik organdar koronavirýstyq infektsiianyń taralýyn boldyrmaý jónindegi is-qimyldy úilestirý maqsatynda QHR jáne basqa da múddeli elderdiń tiisti memlekettik qurylymdarymen qajetti ózara is-qimyldy uiymdastyrýy tiis;
- Qajet bolǵan jaǵdaida QHR Ýhan qalasynda júrgen Qazaqstan stýdentteri men QR basqa da azamattaryn shuǵyl evakýatsiialaýdy qamtamasyz etý;
- Premer-Ministrdiń orynbasary B. Saparbaevtyń tóraǵalyq etýimen vedomstvoaralyq komissiia qurý, oǵan Qazaqstanda koronavirýstyń taralýyna jol bermeý jónindegi is-qimyl josparyn ázirleý tapsyryldy.
