QR Premer-Ministri Asqar Mamin Elbasy Nursultan Nazarbaev bastamashy bolǵan Indýstriialyq-innovatsiialyq damý memlekettik baǵdarlamasynyń iske asyrylýyna, sondai-aq, Memleket basshysy Qasym-Jomart Toqaevtyń Qostanai oblysynyń ónerkásiptik áleýetin damytý jónindegi tapsyrmalarynyń oryndalýyna baqylaý ornatý aiasynda óńirge jumys saparymen bardy, dep habarlaidy "Ult aqparat" primeminister.kz saityna silteme jasap.
Úkimet basshysy Qostanaidyń Indýstriialyq aimaǵyna bardy, onda Qostanai traktor zaýyty bazasynda «Kirovets» qýattylyǵy joǵary traktoryn shyǵaratyn zaýyttyń saltanatty ashylý rásimine qatysty. Kásiporynnyń jobalyq qýattylyǵy — 2025 jylǵa qarai jergiliktendirýdi birtindep 50%-ǵa deiin arttyrǵan jaǵdaida jylyna 700 birlik tehnikaǵa deiin jetedi (interer/ekstererdiń plastikten jasalǵan elementterin daiyndaý, 2021 jyldan bastap – joǵary qysym, ballast júkteriniń tútikterin, 2025 jyldan bastap – kabinalar, baktar, kótergish jaqtaýlar, diskiler, kardan biligin, teńdestirgish daiyndaý jáne t. b.). Úsh kezeńde iske asyrylatyn jobaǵa salynǵan investitsiialardyń jalpy kólemi 7,3 mlrd teńgeni quraidy, óndiriste 500-ge jýyq jańa jumys ornyn jáne irgeles salalarda 700 jumys ornyn qurý kózdelgen.
Premer-Ministrdiń qatysýymen «Peterbýrg traktor zaýyty» AQ (PTZ) bas direktory S. Serebriakov jáne Qazaqstan avtobiznes qaýymdastyǵynyń prezidenti S. Lavrentev «PTZ» AQ-nyń Qostanai traktor zaýytynyń jarǵylyq kapitalyna kirýi týraly kelisimge qol qoidy.
«Qazaqstan aldyna aýyl sharýashylyǵy tehnikalary men onyń quraýyshtarynyń joǵary tehnologiialyq óndiristerin qurý mindetin qoiady. Búgin biz aty ańyzǵa ainalǵan “Kirovets” traktorynyń óndirisin iske qosamyz. Jańa zaýyt Qazaqstannyń aýyl sharýashylyǵy salasyn elimizde qurastyrylǵan “Kirovets” sapaly ári senimdi tehnikasymen qamtamasyz etedi», — dedi A. Mamin.
Úkimet basshysy Qazaqstannyń aýyl sharýashylyǵy tehnikasynyń naryǵyn keńeitýge, ony odan ári eksporttaýǵa, jergiliktendirý protsesterin tereńdetýge jáne servis deńgeiin arttyrýǵa múddeli ekenin atap ótti.
«Qazaqstanda “Kirovets” energiia tiimdi traktorlarynyń zamanaýi óndirisin ashý otandyq mashina jasaý salasyn damytý strategiiasyna sáikes keledi. Atalǵan jobany bastaý ónimdiligi joǵary jańa jumys oryndaryn qurýǵa, aýyl sharýashylyǵy men TKSh salasyna traktorlardy shyǵarýǵa, jergiliktendirýdi ulǵaitýǵa jáne ónerkásiptiń irgeles salalaryn damytýǵa múmkindik beredi», — dedi A. Mamin.
Úkimet basshysy Qazaqstanda alǵash ret shyǵarylǵan «Kirovets» traktoryn ózi synaqtan ótkizdi.
Qazaqstanda «PTZ» AQ ónimderi keńinen taralǵan. Máselen, 2014-2017 jyldar aralyǵynda elimizde 500-ge jýyq «Kirovets» traktory ótkizilgen. Aýyl sharýashylyǵy ministrliginiń derekterine sáikes, QR-daǵy traktorlarǵa degen jyl saiynǵy qajettilik shamamen 1600 traktordy quraidy.
Buǵan qosa, Premer-Ministr jumys sapary aiasynda óńirdegi qurylys jáne toqyma salasyndaǵy iri kásiporyndar — «Qostanai-MBI» JShS úi qurylysy kombinaty men «Bolshevichka» óndiristik kooperativiniń jumysymen tanysty.
Biylǵy 9 aidyń qorytyndysy boiynsha Qostanai oblysynda ónerkásiptik óndiris kólemi 862,8 mlrd teńgeni qurady (naqty kólem indeksi – 115,1%). Taý-ken óndirý ónerkásibiniń kólemi – 373,4 mlrd teńgeni (NKI – 107,8%). Óńdeý ónerkásibinde óndiris kólemi 23,8%-ǵa ulǵaiyp, 446,6 mlrd teńgeni qurady. Ósim mashina jasaý salasyndaǵy kólemniń 95,9%-ǵa (óńdeýdegi úlesi – 36,4%), metallýrgiiadaǵy kólemniń 28,3%-ǵa (óńdeýdegi úlesi – 21,6%), sondai-aq, mashinalar men jabdyqtardan basqa, daiyn metall buiymdary men jeńil ónerkásip kóleminiń ulǵaiýy esebinen qamtamasyz etildi.
