Qazaqstanda tótenshe jaǵdaidyń engizilýine bailanysty elimiz kásipkerleri jyl sońyna deiin múlik, jer jáne jeke tabys salyǵynan bosatyldy. QR Premer-Ministr Asqar Mamin tiisti Qaýlyǵa qol qoidy, dep habarlaidy "Ult aqparat".
Qujatta 2020 jylǵy 31 jeltoqsanǵa deiin: iri saýda obektileri, saýda, oiyn-saýyq ortalyqtary, kinozaldar, teatrlar, kórmeler men dene shynyqtyrý-saýyqtyrý jáne sport ǵimarattary boiynsha zańdy tulǵalar men dara kásipkerler múlik salyǵynan; aýyl sharýashylyǵy ónimin óndirýshiler jer salyǵynan; salyq salýdyń jalpy belgilengen tártibimen jumys isteitin dara kásipkerler jeke tabys salyǵynan bosatylatyny jazylǵan.
Sondai-aq merziminde oryndalmaǵan salyq mindettemeleri boiynsha ósimpuldardy esepteý 2020 jylǵy 15 tamyzǵa deiin toqtatylatyny jazylǵan.
Qaýlyǵa Qosymsha qosa berilgen.
***
Qazaqstan Respýblikasy Úkimetiniń 2020 jylǵy 20 naýryzdaǵy №126 Qaýlysy
«Ekonomikany turaqtandyrý jónindegi odan arǵy sharalar týraly» Qazaqstan Respýblikasy Prezidentiniń 2020 jylǵy 16 naýryzdaǵy №287 Jarlyǵyn iske asyrý jónindegi sharalar týraly
Qazaqstan Respýblikasy Prezidentiniń «Qazaqstan Respýblikasynda tótenshe jaǵdaidy engizý týraly» 2020 jylǵy 15 naýryzdaǵy № 285, «Áleýmettik-ekonomikalyq turaqtylyqty qamtamasyz etý jónindegi sharalar týraly» 2020 jylǵy 16 naýryzdaǵy № 286 jáne «Ekonomikany turaqtandyrý jónindegi odan arǵy sharalar týraly» 2020 jylǵy 16 naýryzdaǵy №287 jarlyqtaryna sáikes salyq-biýdjet saiasatynyń máselelerin retteý maqsatynda Qazaqstan Respýblikasynyń Úkimeti QAÝLY ETEDI:
- 1. Qosa berilip otyrǵan respýblikalyq biýdjetti qalyptastyrýdyń, naqtylaýdyń jáne atqarýdyń erekshe tártibi bekitilsin.
- 2. 2020 jylǵy 31 jeltoqsandy qosa alǵandaǵy kezeńde:
- 1. iri saýda obektileri, saýda-oiyn-saýyq ortalyqtary, kinozaldar, teatrlar, kórmeler men dene shynyqtyrý-saýyqtyrý jáne sport ǵimarattary boiynsha zańdy tulǵalar men dara kásipkerlerdiń múlik salyǵynyń;
- 2. aýyl sharýashylyǵy ónimin óndirýshilerdiń aýyl sharýashylyǵy maqsatyndaǵy jerleri boiynsha jer salyǵynyń;
- 3. salyq salýdyń jalpy belgilengen tártibimen jumys isteitin dara kásipkerlerdiń jeke tabys salyǵynyń mólsherlemelerine «0» túzetý koeffitsienti engizilsin.
- 3. Mólsherlemelerge osy qaýlynyń 2-tarmaǵynda kórsetilgen «0» túzetý koeffitsientin qoldanǵan kezde salyq bazasyn, salyq salý obektilerin, salyq kezeńin jáne salyq mindettemelerin oryndaýdy aiqyndaý «Salyq jáne biýdjetke tólenetin basqa da mindetti tólemder týraly» 2017 jylǵy
25 jeltoqsandaǵy Qazaqstan Respýblikasynyń Kodeksine (Salyq kodeksi) sáikes júzege asyrylady. - 4. Osy qaýlynyń 2-tarmaǵynyń 1) jáne 2) tarmaqshalarynda kórsetilgen salyq tóleýshiler úshin barlyq salyqtar boiynsha merziminde oryndalmaǵan salyq mindettemeleri boiynsha ósimpuldardy esepteý 2020 jylǵy 15 tamyzǵa deiin toqtatyla tursyn jáne salyq eseptiligin tapsyrý merzimi 2020 jylǵy 3-toqsanǵa aýystyrylsyn.
- 5. Qazaqstan Respýblikasynyń Ulttyq ekonomika ministrligi iri qara maldy jáne asyl tuqymdy balapandardy qosylǵan qun salyǵy esepke alý ádisimen tólenetin importtalatyn taýarlardyń tizbesine engizýdi qamtamasyz etsin.
- 6. Osy qaýly qol qoiylǵan kúninen bastap qoldanysqa engiziledi jáne resmi jariialanýǵa tiis.
Qazaqstan Respýblikasynyń Premer-Ministri A. Mamin
