QR Premer-Ministri Asqar Mamin Qaraǵandy oblysyna jumys sapary kezinde «Nurly jol» jáne «Nurly jer» memlekettik baǵdarlamasynyń iske asyrylý barysyn tekserdi, dep habarlaidy "Ult aqparat" primeminister.kz saityna silteme jasap.
Úkimet basshysy jalpy uzyndyǵy 363 shaqyrym bolatyn «Qaraǵandy – Balqash» avtojolynyń rekonstrýktsiiasymen tanysty. Jóndeý jumystaryna 1800 jumysshy jáne 900-ge jýyq tehnika tartylǵan.
Biyl jańalanǵan avtojol tolyqtai ashylady. Sondai-aq onyń boiynda 297 sý ótkizetin qubyr, 17 kópir, jol airyǵynda eki jolótkel jáne aýyl sharýashylyǵy tehnikasynyń ótýi úshin 33 jolótkel salý josparlanǵan.
Biyl «Nurly jol» memlekettik baǵdarlamasy aiasynda Qaraǵandy oblysynda jol qurylysy jumystarymen barlyǵy 800 shaqyrymnan astam jol qamtylatyn bolady.
Premer-Ministr jol qurylysy jumystarynyń qarqynyn kúsheitýdi tapsyrdy jáne qurylatyn jol infraqurylymynyń sapasyn qamtamasyz etýdiń mańyzdylyǵyn atap ótti.
Balqash qalasynda A. Mamin «Nurly jer» baǵdarlamasy aiasyndaǵy áleýmettik turǵyn úidiń salyný barysymen, sondai-aq áýejaidy rekonstrýktsiialaý jáne óńirdiń týristik áleýetin arttyrý jobasymen tanysty.
Sonymen qatar Úkimet basshysy «Kazakhmys Smelting» JShS Balqash mys balqytý zaýytyna bardy, onda óndiris protsesimen jáne kásiporyndy odan ári damytý josparymen tanystyryldy.
