QR Premer-Ministri Asqar Maminniń tóraǵalyǵymen ótken Investitsiialyq shtabtyń otyrysynda Prezident janyndaǵy Reformalar jónindegi joǵary keńes sheńberinde tanystyrylǵan investitsiialardy basqarý boiynsha jańa tásilder qaraldy, dep habarlaidy "Ult aqparat" primeminister.kz-ke silteme jasap.
Ulttyq ekonomika ministri Áset Erǵaliev Qazaqstannyń 2025 jylǵa deiingi Ulttyq damý josparynda, sondai-aq «Nur Otan» partiiasynyń sailaýaldy baǵdarlamasynda negizgi kapitalǵa salynǵan investitsiialar kólemin 2025 jyly JIÓ-niń 30%-yna deiin, tikelei sheteldik investitsiialar kólemin $30 mlrd-qa deiin jetkizý maqsaty qoiylǵanyn atap ótti.
Osy nysanaly kórsetkishterge qol jetkizý úshin investitsiialardy targettelgen jáne proaktivti tartý boiynsha júieli sharalar iske asyrylady. Investitsiialar tartý úshin agroónerkásiptik keshen, týrizm, infraqurylym, mashina jasaý, farmatsevtika, TMK, munai himiiasy, IT, bilim berý jáne qosylǵan qun deńgeii joǵary basqa da salalar basym sektorlar bolyp aiqyndaldy.
Investitsiialardyń nysanaly kólemderiniń kórsetkishteri salalar boiynsha, memlekettik organdar men óńirlerdiń ákimdikteri jyldar boiynsha bóle otyryp, dekompozitsiialandy.
Premer-ministrdiń orynbasary – Syrtqy ister ministri Muhtar Tileýberdi 32,4 trln teńge somasyna 1 600-den astam jobadan turatyn pýl qurylǵanyn aitty.
Tikelei sheteldik investitsiialar aǵynyn qarqyndatý jónindegi jańa tásilderdi iske asyrý sheńberinde QR SIM-niń sheteldik mekemeleri úshin úsh jyldyq Eldik baǵdarlamalar ázirlenip, qabyldandy. Árbir baǵdarlama belgili bir eldiń ekonomikasynyń qurylymynyń ereksheligin eskere otyryp, onyń targetteletin salalary men kompaniialaryn kórsetedi.
Aýyl sharýashylyǵy ministri Saparhan Omarov bes jyl ishinde AÓK salasynda jalpy somasy 4,1 trln teńgege 400-ge jýyq investitsiialyq jobany iske asyrý josparlanyp otyrǵanyn atap ótti. Bul 2025 jylǵa qarai jalpy aýyl sharýashylyǵy óniminiń kólemin 1,3 ese, al eksportty 2 ese ulǵaitýǵa múmkindik beredi.
Bul rette 2023 jylǵa qarai ishki naryqty negizgi áleýmettik mańyzy bar azyq-túlik taýarlary boiynsha otandyq ónimmen molyqtyrý qamtamasyz etiletin bolady.
Qaraǵandy oblysynyń ákimi Jeńis Qasymbek biyl óńirge mashina jasaý, metallýrgiia jáne TMK siiaqty salalarǵa keminde 810 mlrd teńge investitsiia tartý josparlanyp otyrǵanyn aitty. Jyl sońyna deiin 2,5 myńnan astam jańa jumys oryndaryn qurýmen 282,2 mlrd teńge somasyna 14 joba aiaqtalatyn bolady.
Qostanai oblysynyń ákimi Arhimed Muhambetov aldaǵy bes jylda óńirde mashina jasaý, aýyl sharýashylyǵy, jańartylatyn energetika, densaýlyq saqtaý jáne t. b. salalarda 1,6 trln teńgeden astam somaǵa 59 jobany iske asyrý josparlanǵanyn atap ótti.
Strategiialyq josparlaý jáne reformalar agenttiginiń tóraǵasy – «Astana» halyqaralyq qarjy ortalyǵynyń (AHQO) basqarýshysy Qairat Kelimbetov sheteldik jáne otandyq investorlarmen jumys isteýdiń jańa algoritmi AHQO jáne «Kazakh Invest» UK» AQ-nyń barlyq investitsiialyq jobalardy egjei-tegjeili tekserýin kózdeitinin baiandady.
Investorlarmen ózara is-qimyldyń tiimdiligin arttyrý úshin «Kazakh Invest» UK» AQ jáne AHQO-nyń «Business Connect» bólimshesi sarapshylarynan «Task Force» arnaiy kelissóz komandasy qurylatyn bolady.
Sonymen qatar, kvazimemlekettik sektor sýbektileriniń – «Samuryq-Qazyna» UÁQ» AQ men «Báiterek» UBH» AQ-nyń investitsiialar tartý jónindegi jumysqa qatysýy keńeitiledi.
«Jańa investitsiialyq tsikldy qalyptastyrý iskerlik belsendilikti qalpyna keltirýdiń jáne ekonomikanyń odan ári sapaly ósýiniń basty sharty bolyp tabylady», – dedi A. Mamin.
Strategiialyq investitsiialyq kelisimder jasasý jóninde sheshimder qabyldaýdyń negizgi ortalyǵy Investitsiialyq shtab bolady. Úkimet jumysynyń qorytyndysy boiynsha jyl saiynǵy negizde investitsiialar boiynsha Ulttyq baiandama qalyptastyrylady.
