QR Premer-Ministri Asqar Mamin ekologiia máselelerine qatysty ministrlikter men ákimdikterge birqatar tapsyrma berdi, dep habarlaidy QazAqparat.
«Erekshe nazar aýdarý qajet birqatar másele bar. Birinshi, kómirtegi beitaraptyǵyna qol jetkizý sharalary eleýli ózgeristerge ákeletinin eskerip, halyq, biznes jáne jalpy ekonomika úshin yqtimal shyǵyndardy barynsha naqty baǵalaý qajet. Osyǵan bailanysty Ulttyq ekonomika ministrligine Kómirtegi beitaraptyǵyna qol jetkizý strategiiasynyń pysyqtalǵan jobasyn 2022 jylǵy 1 sáýirge deiin engizýdi tapsyramyn», - dedi Premer-Ministr Úkimettiń búgingi otyrysynda.
Sonymen birge, Úkimet basshysy qurylys qaldyqtary men qoqysqa arnalǵan poligondardyń joqtyǵy ruqsatsyz qoqys úiindilerine ákep soǵatynyn eske saldy. Sondyqtan Ekologiia ministrligi ákimdiktermen birlesip, qoldanystaǵy zańnamanyń jańa talaptaryna sáikes qurylys poligondaryn jasaý máselesin pysyqtaýy qajet.
«Úshinshiden, «Jasyl Qazaqstan» ulttyq jobasynda 10 qalada iri kásiporyndardyń lastaýshy zattar shyǵarýyn azaitý sharalary kózdelgen. Osyǵan bailanysty Ekologiia ministrligi ákimdiktermen birlesip, tiisti jol kartalaryn ázirlep, shyǵaryndylardy azaitý kórsetkishterine qol jetkizý boiynsha pármendi sharalar qabyldasyn. Energetika ministrligi ákimdiktermen birlesip, jeke sektor men sharýashylyq júrgizýshi sýbektilerdi gazdandyrý máselesin jandandyrýy qajet», - dedi Asqar Mamin.
