QR Premer-Ministri Asqar Mamin Eýraziialyq úkimetaralyq keńes (EÚAK) otyrysyna tóraǵa retinde qatysyp, onda EAEO-nyń ekonomikalyq turaqtylyǵyn qamtamasyz etý jóninde bastamalar kóterdi, dep habarlaidy "Ult aqparat" primeminister.kz-ke silteme jasap.
Úkimet basshysy Eýraziialyq ekonomikalyq odaq elderiniń negizgi ekonomikalyq kórsetkishteriniń senimdi qalpyna keltirilýin atap ótti. EAEO aiasyndaǵy ózara saýda biylǵy qańtar-maýsym ailarynda shamamen $33 mlrd qurady, bul ótken jyldyń sáikes kezeńimen salystyrǵanda 32%-ǵa artyq. Úshinshi eldermen saýda kólemi 24,5%-ǵa ósip, $371,1 mlrd qurady.
2021 jyldyń birinshi jartyjyldyǵynda EAEO-ǵa múshe memleketterdiń barlyq kólik túrleriniń júk ainalymy 3,1 trln tonna-kilometrge jetti, bul ótken jyldyń sáikes kezeńimen salystyrǵanda 4,6%-ǵa artyq.
Tranzit kórsetkishterinde eleýli ósim baiqalady. Atap aitqanda, tek Eýropa-Qytai-Eýropa baǵyty boiynsha osy jylǵy qańtar-shilde ailarynda Qazaqstan aýmaǵy boiynsha konteinerlik tasymaldar kólemi 47%-ǵa ósip, 381,4 myń JFE qurady.
Premer-Ministr pandemiiamen bailanysty táýekelder buǵan deiin boljanǵannan da uzaq merzimdi sipatqa ie ekenin atap ótti. Osyǵan bailanysty 2020 jylǵy sáýirde EAEO sheńberinde ekonomikalyq turaqtylyqty qamtamasyz etý boiynsha qabyldanǵan sharalardy ózektendirý qajet ekenin atap ótti. EEK-ke tiisti usynystardy 2021 jylǵy qazanda ótetin EÚAK-tyń kelesi otyrysyna engizý tapsyryldy.
Mamin azyq-túlik naryǵyndaǵy turaqtylyqty qamtamasyz etý, AÓK ónimderin óndirý boiynsha EAEO áleýetin arttyrý jáne ony syrtqy naryqtarǵa shyǵarý, sektorda qosymsha qarjylandyrý kózderin qalyptastyrý boiynsha qosymsha birlesken jedel sharalar qabyldaýdyń mańyzdylyǵyn atap ótti.
«Atalǵan mindetterdi iske asyrýdaǵy sapaly tásil bizdiń makroóńirge azyq-túlik qaýipsizdigin qamtamasyz etýge jáne ózin eýraziialyq keńistiktegi eń mańyzdy azyq-túlik habtarynyń biri retinde tanytýǵa múmkindik beredi», — dedi Mamin.
Úkimet basshysy jetekshi qarjy uiymdarymen áriptestikte EAEO-da «jasyl» jobalardy jáne «jasyl» qarjylandyrýdy ilgeriletý jumystaryn jedeldetý qajettigin atap ótti.
QR Premer-Ministri týrizmdi damytýda birinshi kezektegi mindetter retinde EAEO elderi azamattarynyń ortaq naryqtarǵa, onyń ishinde vaktsinalaý pasporttaryn ózara taný, jeńildetilgen karantindik rejimi bar birlesken týristik aimaqtardy qalyptastyrý jáne tsifrlyq infraqurylymdy odan ári damytý arqyly ózara qol jetkizýin jeńildetý jónindegi sharalardy qamtamasyz etýdi atady.
Otyrysta Qazaqstan tarapynyń bastamasy boiynsha sáikestikti baǵalaý salasyndaǵy akkreditteý jónindegi aimaqtyq uiym qurý týraly sheshim qabyldandy. Bul eýraziialyq keńistikte sáikestikti baǵalaý jónindegi ulttyq organdardyń qyzmetin shoǵyrlandyrýǵa, ýaqyt pen qarjy resýrstaryn únemdeýge jáne saýdadaǵy tehnikalyq kedergilerdi alyp tastaýǵa múmkindik beredi.
EAEO sheńberinde organikalyq aýyl sharýashylyǵy ónimderiniń ortaq naryǵyn qalyptastyrý jónindegi is-sharalar jospary, EAEO-ǵa múshe memleketterdiń úilestirilgen (kelisilgen) kólik saiasatyn iske asyrýdyń 2021-2023 jyldarǵa arnalǵan negizgi baǵyttary men kezeńderin iske asyrý jónindegi is-sharalar jospary, EAEO men QHR arasyndaǵy saýda-ekonomikalyq yntymaqtastyqty damytý múddesinde júk temir jol tasymaldaryn tsifrlandyrý jónindegi birinshi kezektegi is-sharalar jospary bekitildi.
Taýarlardy áketý kezinde belgilenetin eksporttyq retteýdiń birjaqty sharalaryn jaqyndastyrý, EAEO-nyń ishki naryǵyndaǵy alyp qoiýlar men shekteýlerdi joiý, Eýraziialyq qaita saqtandyrý kompaniiasyn qurý, jahandyq klimattyq kún tártibin iske asyrý turǵysynan ortaq tásildemeler tujyrymdaý, transshekaralyq esep aiyrysýlardy avtomattandyrý jáne integratsiialaý, munai men gazdyń ortaq naryqtaryn qalyptastyrý jónindegi jumys barysy, temirjol kóliginiń tranzittik áleýetin damytý jáne t. b. máseleler qaraldy.
Otyrysqa sondai-aq Armeniia Premer-Ministri Nikol Pashinian, Belarýs Premer-Ministri Roman Golovchenko, Qyrǵyzstan Premer-Ministri Ýlýkbek Maripov, Resei Premer-Ministri Mihail Mishýstin, Ózbekstan Premer-Ministri Abdýlla Aripov qatysty, Kýba Premer-Ministri Krýs Manýel Marrero beinemálimdeme jasady.
Sholpan-Ata qalasyna jumys sapary aiasynda Úkimet basshysy Asqar Mamin Qyrǵyzstannyń Premer-Ministri Ýlýkbek Maripovpen ekijaqty kelissóz júrgizdi. Eki eldiń saýda-ekonomika, investitsiia, sý-energetika, AÓK, ónerkásiptik kooperatsiia jáne t. b. salalardaǵy yntymaqtastyǵynyń ózekti máseleleri talqylandy.
2021 jyldyń 6 aiynda ekijaqty saýda kólemi $413 mln qurady. Taraptar bul kórsetkishti $1 mlrd deiin jetkizýge nietti.
