QR Premer-ministri Asqar Mamin Úkimettiń Tsifrlyq keńsesinde ortalyq memlekettik organdar basshylarynyń jáne óńirler ákimderiniń qatysýymen áleýmettik mańyzy bar azyq-túlik taýarlarynyń jáne janar-jaǵarmai materialdarynyń baǵalaryn retteý máseleleri jóninde keńes ótkizdi, dep habarlaidy "Ult aqparat" primeminister.kz-ke silteme jasap.
Ótken aptada Qazaqstanda áleýmettik mańyzy bar azyq-túlik taýarlary baǵasynyń jalpy ósý indeksi 0,0% boldy. Qabyldanǵan sharalar esebinen úshinshi apta qatarynan sábiz (-0,8%), piiaz (-0,7%), makaron ónimi (rojki), kúrish jáne kartop (-0,2%) baǵasynyń tómendeýi baiqalady. Qalǵan ónimderdiń baǵalary turaqty.
Óńirlerde «ainalym shemasyn» qarjylandyrý 48,9 mlrd teńgege jetti. Nysanaly deńgei 97,7%-ǵa qamtamasyz etildi. «Ainalym shemasy» boiynsha tiimdi jumys Nur-Sultan, Almaty jáne Shymkent qalalarynda, Almaty, Shyǵys Qazaqstan, Batys Qazaqstan, Qostanai, Soltústik Qazaqstan jáne Túrkistan oblystarynda baiqalady. Júrgizilip jatqan jumystardyń tómen deńgeii Qyzylorda jáne Mańǵystaý oblystarynda saqtalyp tur.
Qabyldanǵan sharalardyń arqasynda janarmai naryǵyndaǵy jaǵdai turaqtandy. Búginde barlyq MÓZ táýlik saiynǵy óndiriste jáne ashyq tústi munai ónimderin ishki naryqqa jónelte otyryp shtattyq rejimde jumys istep jatyr. Biylǵy 19 qarashadaǵy jaǵdai boiynsha munai ónimderiniń jetkilikti jiyntyq qory – 200,6 myń tonna benzin jáne 215,8 myń tonna dizel otyny qalyptastyryldy, bul eldiń 15 táýlikke jetedi.
Ótken aptada Básekelestikti qorǵaý jáne damytý agenttigi monopoliialyq joǵary baǵalardy qoiý belgileri boiynsha Qaraǵandy oblysyndaǵy qus fabrikasyna qatysty tergeý jumysyn bastady.
Qaraǵandy, Shyǵys Qazaqstan, Mańǵystaý oblystary men Nur-Sultan qalasyndaǵy taýyq jumyrtqasy men qus eti naryǵy sýbektilerine baǵa boiynsha sóz bailasý jáne ústem jaǵdaidy teris paidalaný belgisiniń bar ekendigi týraly 7 eskertý jiberildi.
Batys Qazaqstan, Qostanai, Atyraý jáne Jambyl oblystarynda óndirýshilermen, kóterme jetkizýshilermen jáne saýda jelilerimen monopoliiaǵa qarsy komplaenstiń 14 aktisi jasaldy. Jalpy, respýblika boiynsha monopoliiaǵa qarsy komplaenstiń 154 aktisi jasaldy.
Premer-ministr ortalyq memlekettik jáne jergilikti atqarýshy organdarǵa áleýmettik mańyzy bar azyq-túlik ónimderiniń baǵasyn turaqtandyrý jáne tómendetý, sondai-aq infliatsiianyń jalpy deńgeiin 8,5% sheginde ustap turý jumysyn jalǵastyrýdy tapsyrdy.
Óńirlerdiń ákimdikterine óndiris pen tutyný teńgerimin eskere otyryp, turaqtandyrý qorlarynda jetkilikti qorlardy qamtamasyz etý, «ainalym shemasy» boiynsha qarjylandyrýdy usynylǵan kólemderge deiin jetkizý, baǵa belgileýdiń barlyq tizbegi boiynsha deldaldyq shemalardy tekseretin óńirlik komissiialardyń jumysyn jandandyrý tapsyryldy.
Aita keteiik, jiynda qazirgi jaǵdai men atqarylyp jatqan jumystar týraly saýda jáne integratsiia ministri Baqyt Sultanov, aýyl sharýashylyǵy ministri Erbol Qarashókeev, energetika ministri Maǵzum Myrzaǵaliev, Básekelestikti qorǵaý jáne damytý agenttiginiń tóraǵasy Serik Jumanǵarin, Shyǵys Qazaqstan oblysynyń ákimi Danial Ahmetov, Jambyl oblysynyń ákimi Berdibek Saparbaev, Aqtóbe oblysynyń ákimi Ońdasyn Orazalin, Pavlodar oblysynyń ákimi Ábilqaiyr Sqaqov jáne t. b. baiandady.
