QR Premer-Ministri Asqar Maminniń tóraǵalyǵymen ótken Úkimet otyrysynda «Aýyl – el besigi» jobasyn iske asyrý barysy qaraldy, dep habarlaidy "Ult aqparat" primeminister.kz caityna silteme jasap.
Atalǵan baǵytta atqarylyp jatqan jumystar týraly Premer-Ministrdiń orynbasary R. Skliar, óńirlerdegi jaǵdai týraly Almaty oblysynyń ákimi A. Batalov, Shyǵys Qazaqstan oblysynyń ákimi D. Ahmetov, Aqmola oblysynyń ákimi E. Marjyqpaev baiandady.
«Aýyl – El besigi» jobasyn iske asyrý Elbasynyń 2019 jylǵy 27 aqpanda «Nur Otan» partiiasynyń XVIII sezinde bergen tapsyrmalaryna sáikes bastaldy. Joba Elbasy N. Nazarbaevtyń jáne Prezident Q. Toqaevtyń tapsyrmalary boiynsha ázirlenip jatqan aýdandar, qalalar men oblystar boiynsha aýmaqtardy damytýdyń óńirlik baǵdarlamalary úshin berik negiz bola alady.
«Aýyl – El besigi» jobasynyń negizgi maqsaty – aýyldyq jerlerde ómir súrý sapasyn jaqsartý, aýyldyq aýmaqtardyń infraqurylymyn jańǵyrtý, olardy Óńirlik standarttar júiesiniń parametrlerine keltirý. Jańa ádisteme boiynsha 3477 perspektivaly aýyl irikteldi, onda 6,6 mln adam nemese aýyl halqynyń 85% turady. 2027 jylǵa deiin Jobaǵa bólinetin qarajatty 900 mlrd teńgege deiin josparlanǵan qosymsha arttyrýdy eskerýmen, aýyldyq jerlerdi damytýǵa baǵyttalǵan basqa memlekettik baǵdarlamalarmen birge qarjylandyrýdyń jalpy kólemi 2 trln teńgeden asady, al jobalar sany 30 myńnan astam.
Premer-Ministr A. Mamin Jobany iske asyrý aiasynda 7 jyl ishinde aýyldardyń barlyq infraqurylymyn jańartý, 7 myń shaqyrymnan astam joldy jáne aýylishilik kóshelerdi salý jáne jóndeý tirshilikti qamtamasyz etetin injenerlik jelilerdi salý, sapaly aýyz sýmen 100% qamtamasyz etý, bilim berý, densaýlyq saqtaý, mádeniet jáne sport obektilerin rekonstrýktsiialaý jáne salý, sonymen qatar 130 myń jańa jumys oryndaryn qurý arqyly 7 mln-ǵa jýyq aýyl turǵyndarynyń turmys sapasyn jaqsartý kútilip otyrǵanyn atap ótti.
Úkimet basshysy «Aýyl – El besigi» jobasyn qarjylandyrýdy ulǵaitý týraly usynystardy engizýdi, jyldar boiynsha toptastyryp jáne qajetti qarjylandyrý kólemimen tirek jáne spýtniktik aýyldyq eldi mekenderdiń tizimin qaita qaraýdy, sondai-aq aǵymdaǵy jyldyń sońyna deiin 2020-2026 jyldarǵa arnalǵan jańartylǵan «Aýyl – el besigi» jobasyn daiyndaýdy tapsyrdy.
Shyǵyndardyń 70%-y respýblikalyq biýdjetten qarjylandyrylatyn bolady. Óńirlerdiń ákimdikterine shyǵyndardyń qalǵan 30%-yn birlesip qarjylandyrý kózderin anyqtaý tapsyryldy. Sonymen qatar, jobalardy júzege asyrý úshin biýdjetten tys qarajat tartý, qajetti qujattamany daiyndaý jáne árbir tirek jáne spýtniktik aýyldyq eldi meken úshin Ekonomikany damytý josparlaryn ázirleý qajet.
