QR Premer-Ministri Asqar Maminniń tóraǵalyǵymen ótken QR Úkimetiniń otyrysynda 2019 jylǵy qańtar–shildedegi QR áleýmettik-ekonomikalyq damý qorytyndysy jáne respýblikalyq biýdjettiń oryndalýy qaraldy, sondai-aq jańa oqý jylynyń bastalýyna daiyndyq máseleleri talqylandy, dep habarlaidy "Ult aqparat".
Otyrystyń kún tártibindegi birinshi másele boiynsha ulttyq ekonomika ministri R. Dálenov, indýstriia jáne infraqurylymdyq damý ministri R. Skliar, QR Ulttyq bankiniń tóraǵasy E. Dosaev, birinshi qarjy vitse-ministri B. Sholpanqulov baiandady.
Óńirlerdiń áleýmettik-ekonomikalyq damý qorytyndylary boiynsha Almaty oblysynyń ákimi A. Batalov, Jambyl oblysynyń ákimi A. Myrzahmetov, Soltústik Qazaqstan oblysynyń ákimi Q. Aqsaqalov tyńdaldy.
QR Premer-Ministri 2019 jylǵy 15 shildedegi Úkimettiń keńeitilgen otyrysynda Memleket basshysy Q. K. Toqaev alǵa qoiǵan mindetter aiasynda Úkimettiń negizgi basymdyqtary — halyqtyń turmys sapasyn jaqsartý, tabysyn arttyrý, jańa jumys oryndaryn ashý, investitsiialyq ahýaldy jaqsartý ekenin atap ótti.
«QR Úkimetiniń keńeitilgen otyrysynyń qorytyndysy boiynsha bekitilgen naqty sharalar jospary bizdiń ekonomikamyzdyń odan ári damýyna oń yqpalyn tigizetin bolady.
Osy jyldyń qańtar-shilde ailarynda JIÓ ósimi ótken jyldyń tiisti kezeńine shaqqanda 4,2% qurady. Oń ósim qurylysta 11,5%-dy, saýdada 7,5%-dy, kólik salasynda 5,4%-dy, óńdeý sektorynda, onyń ishinde mashin ajasaýda 17,7%-dy, jeńil ónerkásipte 14,3%-dy, tústi metaldar alýda 17,2%-dy, munai óńdeýde 5,1%-dy qurady.
Sonymen qatar, salalyq ministrlikter kómir, shiki munai óndirý, himiia ónerkásibi jáne qara metallýrgiia salasyndaǵy josparlanǵan kórsetkishterge jetý boiynsha sharalardy kúsheitýi kerek.
7 aidyń qorytyndysy boiynsha negizgi bazalyq kórsetkishter boiynsha Atyraý, Qaraǵandy, Qostanai, Qyzylorda, Túrkistan jáne Shyǵys Qazaqstan oblystarynda ekonomikalyq ósimge qol jetkizildi. Ákimder men memlekettik organdardyń, óńirlerdiń basshylary sońǵy nátijege qol jetkizýge jáne biýdjet qarajatyn josparly igerýge derbes jaýap beredi.
Elbasy bastamalary men Memleket basshysynyń qazaqstandyqtardyń ál-aýqatyn jaqsartý jónindegi tapsyrmalaryn ýaqytyly jáne sapaly oryndaý úshin investitsiialardy belsendi tartýdy, ónimdi jumys oryndaryn qurýdy, ekonomikany ártaraptandyrýdy, ónimdilikti arttyrýdy, eksportty ilgeriletýdi, tehnologiialar men innovatsiialar transfertin jalǵastyrý qajet», — dedi A. Mamin.
Jańa oqý jylynyń bastalýyna daiyndyq týraly QR bilim jáne ǵylym ministri A. Aimaǵambetovtyń, sondai-aq Túrkistan oblysynyń ákimi Ó.Shókeev pn Nur-Sultan qalasynyń ákimi A. Kólginovtyń baiandamalary tyńdaldy.
Búgingi tańda mektepterdiń jańa oqý jylyna daiyndyǵy 85%-dy quraitynyn aita kele, Úkimet basshysy barlyq bilim berý nysandaryn 1 qyrkúiekke deiin 100%-ǵa daiyndaý qajettigin aitty. Arys qalasyndaǵy mektepterdiń oqý jylyna daiyndyǵyna erekshe nazar aýdarý tapsyryldy.
QR Premer-Ministri oqýlyqtarmen qamtamasyz etý, balalardy tasymaldaý jáne mektep oqýshylaryna ystyq tamaq berýdi uiymdastyrý máselesine basa nazar aýdara otyryp, «osy jyldyń 15 shildesinde ótken QR Úkimetiniń keńeitilgen otyrysynda Memleket basshysynyń bilim berý uiymdarynyń materialdyq-tehnikalyq bazasyn nyǵaitý turǵysynan, onyń ishinde kompiýterlendirý, mektep protsesterin tsifrlandyrý máseleleri boiynsha bergen tapsyrmalaryn oryndaýdy kúsheitý qajettigin» aitty.
