Advokat Aijan Táshenova Facebook jelisindegi jazbasynda Mamai men Imanbaevanyń zańdy kúshine engen sot sheshimin oryndaýdan múldem negizsiz bas tartatynyn atap ótti. Osylaisha olar kez kelgen demokratiialyq memlekettiń basty qaǵidaty – Zań ústemdigin arsyz belden basýda.
«Qurmetti dostar! Keshe Mamai men Imanbaeva kezekti márte oisyrai jeńildi!
Almaty qalalyq soty B.Baibektiń ar-namysyn, abyroiyn jáne iskerlik bedelin qorǵaý jóninde talap aryzy boiynsha sot sheshiminiń tolyq oryndalmaýyna bailanysty Mamaidyń júrgizýshi kýáligin qoldanýyn toqtatý, sondai-aq boryshkerlerge kez-kelgen ruqsatnamalar men litsenziialardy alýǵa ýaqytsha tyiym salý týraly sheshimdi ózgerissiz qaldyrdy.
Esterińizge sala ketsem, jaýapkerler maǵan senim bildirýshi týraly sot shyndyqqa janaspaidy dep tanyǵan materialdardy teriske shyǵaryp, olardy óshirip tastaýdan negizsiz bas tartyp otyr.
Men osyǵan deiin jazǵanymdai, sot sheshimi osylai bolatyny belgili edi. Mamai men Imanbaeva bul joly da sotta ózderiniń sandyraq áreketterine qatysty kókeige qonymdy quqyqtyq negiz usyna almady. Eń kúlkilisi sol, jaýapkerler bul ailany sot bastalǵannan beri, iaǵni jarty jyl kóleminde qoldanyp keledi.
Endi qorytyndylarǵa qysqasha toqtalyp óteiin.
Birinshiden, Mamai men Imanbaeva ashyq ári jariia sotta B.Baibekke qatysty jariialaǵan ósek-jalalaryna birde-bir dálel keltire almaǵanyn bilesizder. Nátijesinde barlyq instantsiialarda jeńilis tapty: Imanbaevanyń aryzy Joǵarǵy sotta da qaralyp, shaǵymy qanaǵattandyrýsyz qaldyryldy. Bul - eń sońǵy sot instantsiiasy.
Kassatsiialyq satyda tek Imanbaeva ǵana shaǵym túsirgenin atap ótkim keledi. Al Mamai buǵan deiin jariialaǵan sandyraq málimdemelerine qaramastan, jubaiyn «otqa tastap», ózi shette qaldy. Keshegi jazbasynda Mamai Joǵarǵy sotqa bergen aryzym jaýapsyz qaldy-mys degen syltaý aitypty.
Bul Mamaidyń taǵy bir kezekti arsyz ótirigi. Sot zańǵa sáikes resimdelgen kez-kelgen shaǵymǵa dáleldi jaýap berýge mindetti. Sondyqtan da onyń ashyqtyq týraly qoimai aityp júretinin eskere otyryp, Mamaiǵa óz sóziniń dáleli retinde Joǵarǵy Sotqa jibergen ótinishin jáne oǵan berilgen jaýapty jariia etýdi usynamyn. Sonymen qatar, shyndyqty anyqtap, Mamaidyń kassatsiialyq sotqa shaǵymdanǵanyn nemese shaǵymdanbaǵanyn anyqtaý maqsatynda men ony kútpei-aq Joǵarǵy Sotqa saýal joldadym.
Mamai kassatsiiaǵa júginse de, onyń shaǵymynyń mazmuny Imanbaevanyń talap-aryzymen sáikes bolaryn eskere otyryp, sheshim de soǵan uqsas bolady, iaǵni shaǵym qanaǵattandyrýsyz qalatyna erekshe nazar aýdarǵym keledi.
Sonymen qatar, búkil protsess kezeńindegi jaýapkerlerdiń is-áreketteri men ustanymdarynyń qaishylyǵyn atap ótkim keledi. Sot sheshimimen kelispeitini týraly jariia málimdemelerine qaramastan, Mamai men Imanbaeva óz áreketteri arqyly sheshimdi tolyq moiyndady.
Iaǵni, Mamai men Imanbaeva sot arqyly óndirip alynǵan barlyq somany óz erkimen ári májbúrleýsiz ýaqytyly tóledi: olar B.Baibek aýtizmi bar balalarǵa kómek retinde jibergen 876 402 teńge kóleminde sot shyǵyndaryn, sondai-aq sot sheshimin tolyq oryndamaǵany úshin ákimshilik is júrgizý sheńberinde Almaty qalasynyń biýdjetine árqaisysy 140 jáne 15 myń teńgeden aiyppul ótedi.
Ekinshiden, Mamai men Imanbaeva barshaǵa ózderiniń aldamshy bolmysyn, quqyqtyq nigilizmin taǵy da kórsetti.
Keshegi otyrysta Imanbaeva sot sheshiminiń oryndalmaý sebebin túsindirip, naqty máseleniń máni boiynsha sóileý týraly sottyń ótinishine ádettegidei baibalam salyp, nazardy istiń taqyrybyna emes, basqa máselelerge aýdardy. Sot birneshe ret eskertý jasaýǵa májbúr bolyp, Imanbaevany sot otyrysynan shettetti. Mamai men Imanbaeva árqashan mysal retinde keltiretin damyǵan demokratiialyq elderde bul áreketteri úshin áldeqaida barynsha qatań jaýapkershilikke tartylar edi.
Óz kezeginde, Mamai ózine tán emes qylyq tanytyp, protsess boiy únsiz qalǵanyn atap ótemin. Shamasy, Imanbaevany protsessten shettetý oǵan áser etken sekildi.
«Bir apam bar, odan ótken soraqy» degendei, jaýapkerlerdiń «zańgeri» Qaliev taǵy da erekshelendi. Ol protsesti barynsha sozýǵa tyrysyp, tipti shekteý sharalaryn qoldaný rásimderine qatysty zańnamalyq olqylyqtarǵa bailanysty-mys otyrysty toqtatý jáne Konstitýtsiialyq Keńeske júginý týraly negizsiz ótinish bildirdi. Zańǵa sáikes sot bul ótinishti qabyldamady.
Qalievke odan góri zańdardy muqiiat oqýǵa jáne protseske jaqsylap daiyndalýǵa taǵy da keńes beremin!
Mamai men Imanbaevaǵa qatysty barlyq sanktsiialar «Atqarýshylyq is júrgizý jáne sot oryndaýshylarynyń mártebesi týraly» zańda naqty jazylǵanyn atap ótemin.
Úshinshiden, Mamailar jubynyń shekten shyqqan printsipsizdigi men alalaýshylyǵy odan saiyn tań qaldyrýda.
Mamaidyń logikasyna qaraityn bolsaq, ol basqalardy esh dálelsiz, kópshilik aldynda qorlap jáne túbegeili jalǵan aqparat taratý arqyly olardyń konstitýtsiialyq quqyqtaryn anaiy jáne ashyq túrde buza alady. Biraq, zań boiynsha ony jaýapqa tartqanda, Mamai birden Konstitýtsiiaǵa júgine bastaidy.
Al, Imanbaeva odan asyp túsip, balalarynyń artyna jasyrynyp, aiap-esirkesin degen aila-sharǵymen qoǵamdyq pikir qalyptastyrmaqshy. Bul endi tsinizmniń shyńy, onyń boiynda uiattyń jurnaǵy da qalmaǵan, tipti balalar da onyń saiasi oiynda paidalanar quralyna ainalyp ketken.
Qazir Mamai men Imanbaevanyń ótirikke belshelerinen batqany, olar úshin tek aqsha men paidakúnemdik múddeleri ǵana mańyzdy ekendigi bárine belgili. Júrgizýshi kýáligine qatysty olar qalai dúrlikkenin qarańyzdarshy. Al olardyń ar-ojdannan attap ótip, qadir-qasietine, balalaryna, ata-analary men týysqandaryna qarmastan kóptegen adamdardy jariia túrde qorlaǵany múldem alańdatpaidy da, basqa adamdardyń konstitýtsiialyq quqyqtaryna túkirgeni bar.
Áitse de, Mamai men Imanbaevadan bar bolǵany sot sheshimin oryndaý – sot sheshimine sáikes B.Baibekke qatysty jalǵan materialdardy teriske shyǵarý jáne joiý talap etilip otyr. Sonda barlyq shekteýler alynyp tastalady. Bul olardyń óz tańdaýlary jáne óz sheshimderi!
Olardyń tabandap otyryp alýlarynyń sebebi qarapaiym ǵana: Mamai jala japqan jariialanymdar men beineler joiylǵan jaǵdaida, onyń «saýdyraǵan sózden salynǵan saraiynyń» shańyraǵy ortasyna túsedi dep shoshynýyna bailanysty bolýy múmkin. Sonda onyń jalǵan ekijúzdi beinesin kórip, tipti artynan ergen shaǵyn «tobyry» da odan keri ainalmaq.
Eger Mamai men Imanbaeva arsyz jala jaýyp, ózderiniń teris piǵyldy is-áreketin jalǵastyra berse, onda olarǵa atqarýshylyq is júrgizý týraly habarlama berilgen kúnnen bastap 6 ai ótken soń, iaǵni kelesi jyldyń naýryz aiynda sot sheshimin oryndamaǵany úshin sot oryndaýshysy qylmystyq is qozǵaýǵa májbúr bolady.
Bul jaǵdaida, bizdiń ustanymymyz óte qarapaiym: biz Mamai men Imanbaevany olardyń árqaisysy úshin zańǵa sáikes 800 saǵatqa jetýi múmkin qoǵamdyq jumystarǵa tartýdy talap etemiz. Iaǵni, olarǵa Almaty kóshelerin sypyrýǵa týra keledi.
Qorytyndylai kelgende, Mamai men Imanbaeva – ideia jolynda japa shegýshiler emes, kerisinshe zańdy kúshine engen sot sheshimin oryndaýdan esh negizsiz bas tartqan printsipsiz jáne ziiankes zań buzýshylar!
Osylaisha olar kez kelgen demokratiialyq memlekettiń basty qaǵidaty – Zań ústemdigin arsyz belden basýda. Iaǵni, «ańqaý elge aramza moldanyń» kebin keltirip otyr.
Alaida, sottyń arqasynda Mamai men Imanbaevanyń barlyq maskalary tolyǵymen sheshildi. Endi olardyń sózderi men is-áreketteriniń tolyqtai jalǵan ekenin túsinip, barlyǵy olardyń shynaiy bolmysyn kórdi», - dedi Táshenova óz jazbasynda.
