Qyzylordalyq eńbek ardageri Bibigúl Ábisheva kezinde tehnikany sheber meńgerip, sharýashylyqta traktor tizgindegen. Búginde jetpis jasqa jaqyndaǵan ol áli de traktordy ornynan qozǵap, kókeige túigenin izbasarlarymen bólisip turady, dep habarlaidy QazAqparat.
Qazir zeinet demalysyna shyqqan keiýana eńbek jolyn Jalaǵash aýdanyndaǵy Kommýnizm (qazirgi Móráli Shámenov aýyly) sharýashylyǵynda bastaǵan. Aýdandaǵy ýchilishede tálim alǵan ony sharýashylyq basshysy M. Shámenov jumysqa shaqyrady.
«Biz ýchilisheni 1969 jyly jeti qyz bitirgen edik. Sharýashylyq basshysy Móráli aǵamyz bizge eńbek etýge usynys bildirdi. Qyrman basyna kelgende birneshe traktor tizilip tur eken. Meniń enshime túri jańalaý kóringen traktor tidi. Osylaisha eńbek jolym bastalyp ketti», - deidi eńbek ardageri.
Sodan bergi jyldarda ol ózine mindettelgen tapsyrmaǵa úlken jaýapkershilikpen qarai bildi. Astyqty shashpai-tókpei jinap alýǵa barynsha kúsh salatyn. Aǵa býyn ókilderi jas qyzdyń jankeshti eńbegine joǵary baǵasyn beretin edi.
Beride turmys qurǵannan keiin Qarmaqshy aýdany Jańajol aýylyna qonys aýdardy. Munda da eńbek kórigin qyzdyryp, sharýashylyqtyń tolaǵai tabysqa kenelýine zor úlesin qosty. 1975 jyly «Shalqar» komsomol jastar brigadasyn quryp, mal sharýashylyǵynda eńbek etti. Odan keiin qaitadan óziniń mehanizatorlyq kásibine oralyp, traktor rýlin tizgindedi.
«Qazir tehnikanyń túri de kóp qoi. Shetelden kelgen kóptegen traktormen kombaindardy kórýge bolady. Bizdiń kezimizde negizinen reseilik tehnikalardy paidalanyp keldik», - deidi eńbek ardageri.
Aýyldastarynyń aitýynsha, traktorshy Bibigúl táýligine 80-90 tonnaǵa deiin astyq tasymaldap, el-jurttyń aldynda úlken abyroiǵa kenelgen. Keńes odaǵy jáne Qazaqstan joǵary keńesine delegat bolyp sailandy.
«Jalpy, kásiptiń jaqsysy-jamany joq. Óz mamandyǵyńa qurmettep, qyzyǵa jumys isteitin bolsań, odan abyroiǵa kenelýge negiz bar», - deidi ol.
Bibigúl Ábishevanyń joldasy – Káriman Sadyqov ta kezinde sharýashylyqta mehanizator bolyp eńbek etken. Ekeýi urpaq ósirip, olarǵa sanaly tárbie bere bildi.
