Aleksandr Lýkashenko Mogilevsk oblysyna sapary kezinde osy óńirdiń birneshe joǵary shendisin, sonyń ishinde oblys gýbernatoryn, Prezidenttiń oblys boiynsha kómekshisin jáne Shklovski aýdanynyń basshysyn qyzmetinen aiyrdy. Oǵan basty sebep – mal qoradaǵy masqara, dep habarlaidy ONT belarýs telearnasy.
Lýkashenko 26 naýryzda "Kýpalovskoe" agroholdingin aralaidy, biraq ol josparlanǵan baǵyttan taiyp, mal qoraǵa tikesinen tartqan. Al mal qora "kisi tamashalaýǵa" daiyn bolmai shyqqan. Odan bólek ondaǵy maldardyń da jai-kúii máz bolmapty. Yńyrshyǵy ainalǵan kári móshke táltirektep áreń turǵanǵa uqsaidy.
"Qarashy, myna siyr óleiin dep áreń tur ǵoi. Kórmeisiń be, yńyrshaǵy ainalyp ketkenin. Nege munda meni ákeldińder? Qoldaryna kisen taqsyn dep pe? Munyń Osventsim ekenin túsinbeitin adamdy qalai agroholding basshysy qylǵansyńdar? Ol ne, osynyń bári durys dep oilai ma? Nesin jóndeidi? Bul arany kúnde, minýt saiyn jóndeý kerek! Qora tazalaityn adam bolý kerek. Maldyń asty únemi qurǵaq bolýy tiis!", - dep aiqalady aiaq-asty mal qoraǵa kirip, ondaǵy masqaraǵa kýá bolǵan Lýkashenko.
Belarýs kóshbasshysy bul úshin shendiler qyzmetinen aiyrylyp qana qoimaitynyn, tipti qylmystyq is qozǵalatynyn da aitty.
"Qazir qasymda qandai adamdar júr? Báriniń tizimin keshke deiin aldyma qoiyńdar. Bireýin de qaldyrmaimyn. Bárin ornynan alamyn. Kinálilerdiń qolyna kisen salynady", - dedi Lýkashenko.
