Túrkistan oblysynyń ákimi Maqtaaral aýdanynda eki aýyldy sý basýyna bailanysty halyqqa beineúndeý joldady, dep habarlaidy "Ult aqparat".
Videoda Túrkistan oblysynyń ákimi jaǵdaidy túsindirip, turǵyndardy úreige boi aldyrmai, sabyr saqtaýǵa shaqyrady.
«Ózbekstan tarapymen sóilestim. Ol jaqta qoimadan shyqqan sý toqtatylǵan. Maqtaaraldaǵy kollektordyń qýaty - sekýndyna 120 tekshe metr. Alaida túnimen sekýndyna 180 tekshe metrden sý aǵyp, aýyldardy sý basyp qalǵan. 4 eldimekennen 5400 adam kóshirildi. Olarǵa tiisti kómek kórsetilip, qajetti zattarmen qamtamasyz etiledi. Qazir biz sý basqan óńirlerdi qaitadan aralap, tekserip shyǵamyz. Sý basý qaýpi seiilse, halqy kóshirilgen úilerdi kúzetke alamyz. Múlkin, malyn politsiia qorǵaidy. Mal men adam shyǵyny joq. Sý deńgeii áli de kóterilse, taǵy 4 eldi mekenniń halqyn evakýatsiialaimyz. Ol - Nurly jol, Ferdaýsi, Jantaqsai jáne Jailybai aýyldary. Qazir dúrligip, úreilenbeńizder. Bári retteledi. Jergilikti aýqymdaǵy tótenshe jaǵdaidy retteýge oblystyq tolyq múmkindigi bar», - deidi Ómirzaq Shókeev.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avomobil jolyn sý basyp, kólik júre almaýda.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr.
