Sý tasqyny bolǵan Maqtaaral aýdanyna kómekke Ózbekstan azamattary men arnaiy tehnikalar kelip jetti. Bul týraly óńirlik ákimdik qyzmetkerleri Facebook paraqshasynda jariia etti, dep habarlaidy "Ult aqparat".
Apat bolǵan aimaqtaǵy jedel shtabtyń aqparattyq bólimi mamany Qanat Baisovtyń aitýynsha, kórshi elden 42 arnaiy tehnika men 200 adam kelgen. Tehnikalardyń arasynda sý sorǵysh, býldozer jáne bóget salýǵa qajetti túrleri bar. Sondai- aq ózbekstandyq jasaq eldi mekenderge jaiylǵan sýdy tazalaý men sý sorý jumystaryn júrgizbek. Sonymen qatar turǵyn úilerdiń qurylysyna da atsalysady. Jumysshylar ózderimen birge as-aýqaty men janar-jaǵarmaiyn da ala kelipti. Olar munyń bári Ózbekstan prezidenti Shavkat Mirziioevtiń tapsyrmasyna sai atqarylyp jatqan shara ekenin jetkizgen. Sheteldik kómekshiler erteńgi kúni taǵy turǵyn úilerdiń qurylys jumystaryna qosymsha jumysshylar keletinin jáne qajetti qurylys materialdar jetkiziletinin málim etken.
Aita keteiik, buǵan deiin oblys ákimi Ómirzaq Shókeev birqatar mamandarmen ózbek eline baryp, sý tasqyny máselesi boiynsha kelissózder júrgizgen bolatyn. Al, kúni keshe Ózbekstan respýblikasynyń prezidenti Shavkat Mirziioev «kórshi Maqtaaral aýdanyn sý shaiyp ketkenin jáne apat saldaryn joiýǵa kómektesemiz» dep ýáde bergen edi.
