Búgin Batys Qazaqstan oblysy Oral qalasynan jolǵa shyqqan kerýen Maqtaaral aýdanyna kelip jetti. 12 tonna gýmanitarlyq kerýen kóligine azyq-túlikter men qurylys materialdary, kiim-keshek jáne turmystyq qajetti qural-jabdyqtar tielgen, dep habarlaidy "Ult aqparat".
Gýmanitarlyq kómekti jinaýǵa Batys Qazaqstan oblysynyń etnomádeni birlestikteriniń ókilderi men kásipkerler, eriktiler úles qosqan.
Sý tasqynynan zardap shekken maqtaaraldyq aǵaiyndarǵa kómek qolyn sozýǵa batystaǵy «Vainah» sheshen-ingýsh etnomádeni ortalyǵy men «Birlik» eriktiler toby, «Dostyq» qazaq-vainah pen «Patriot» sport klýby, sonymen birge «Kadyrgaliev T.A.» JK, «UralskRunners» júgirýshilerdiń klýb músheleri uiymdastyrýǵa atsalysyp, qarajat jinaýǵa sep bolǵan.
Batystan ońtústikke deiin jol tartqan kómek kóligin Túrkistan oblysy ákimi apparatynyń «Qoǵamdyq kelisim» KMM-niń Maqtaaral aýdanyndyq filialy mamandary, etnomádeni birlestik tóraǵalary men músheleri kútip alyp, gýmanitarlyq kómek qoimaǵa tapsyryldy.
Aita keteiik, buǵan deiin Batys Qazaqstan oblysy men ondaǵy aýdandardan da gýmanitarlyq kómek kelgen bolatyn.
