Túrkistan oblysynyń Maqtaaral aýdanyndaǵy jańa móltek aýdanda salynyp jatqan 31 úidiń qurylysy tolyq aiaqtaldy. Baspanalardyń 25-i úkimet rezervinen, 6-y Nur Otan partiiasynyń «Biz birgemiz» qory esebinen boi kótergen, dep habarlaidy "Ult aqparat".
Maqtaaral aýdandyq Cáýlet, qala qurylysy jáne qurylys bóliminiń basshysy Bijan Anarbekovtiń aitýynsha, tamyz aiynyń birinshi kúninde munda 100 úidiń qurylysy tolyq aiaqtalady dep josparlanǵan. Qurylysty mejelengen kúnde bitirý maqsatynda qazirgi tańda shaǵyn aýdanda 209 úidiń shatyry jabylyp, 166 úidiń ishki-syrtqy árleý jumysy júrgizilýde. Jańa móltek aýdanda qurylys jumysy toqtaýsyz júrgizilip, 1359 qurylysshy túngi jáne kúndizgi aýysymda jumys istep júr.
«Móltek aýdanda jeke turǵyn úi qurylysynan bólek, 1 200 oryndyq mektep pen 280 oryndyq balabaqshanyń da qazandyq shuńqyryn qazý júrgizilýde. Qazirgi tańa eki nysanda 20-ǵa tarta aýyr tehnika jumys istep júr. Budan bólek, móltek aýdandy infraqurylymmen qamtamasyz etý isi de birge júzege asyrylýda. Atap aitsaq, aýyz sý tartý, gaz jelisin ornatý, káriz júiesin, jol salý , asfalt tóseý jumystary da júrgizilýde», - deidi Bijan Anarbekov.
Bul móltekaýdan aldaǵy bir aidyń kóleminde jańa keiipke enbek. Ol úshin shaǵyn aýdandy qaq jaryp ótetin respýblikalyq mańyzy bar joldyń eki betinen eni 40, uzyndyǵy 60 metrdi quraityn demalys alleiasy salynýda. Sondai-aq, móltekaýdannyń kireberisindegi kanal boiynan da turǵyndar demalatyn shaǵyn saiabaqtyń qurylysy júrgizilip jatyr. Budan bólek, 25 tósek oryndy dárigerlik ambýlatoriia men meditsinalyq tirek pýnkti eki aida paidalanýǵa berilmek.
