Túrkistan oblysy Maqtaaral aýdanynda sý basqan eldimekenderden turǵyndardy kóshirýge 450 politsei jumyldyryldy. Halyqty evakýatsiialaý úshin Maqtaaral, Jetisai jáne Saryaǵash APB jeke quramy men Ulttyq ulannan 250 áskeri atsalysty, - dep habarlaidy Oblystyq PD baspasóz qyzmeti.
Oblystyq PD baspasóz qyzmetiniń málimetinshe, Myrzakent kentindegi №4 mektepte 2200 adamǵa arnalǵan evakopýnkt daiyndalǵan. Tehnogendik tótenshe jaǵdai oryn alǵan aýmaqqa Túrkistan oblysy politsiia departamentiniń bastyǵy, politsiia general-maiory Qairat Dálbekov te arnaiy keldi.
Qazirgi ýaqytta oqiǵa ornynan 5400 turǵyn evakýatsiialanǵan. Keibireýleri ózderi kóship, basqalarǵa kómek kórsetken. Tártip saqshylary qoǵamdyq tártip pen azamattardyń qaýipsizdigin qamtamasyz etý boiynsha jumystar júrgizip, basqa da qajetti sharalar qabyldaýda.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avomobil jolyn sý basyp, kólik júre almaýda.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr.
